1 ноябрдан «газ заправка»лар иш тартибига ўзгартириш киритилмаган – Энергетика вазирлиги

Энергетика вазирлиги матбуот хизмати хабарига кўра, 1 ноябрдан бошлаб АГҚКШнинг иш тартибига ҳозирча ҳеч қандай ўзгартириш киритилмаган.

Тошкент шаҳрида 54та газ тақсимлаш станцияларида янги иш жадвали жорий этилиши ва навбатма-навбат (бирданига эмас), ҳар уч кунда бир мартa соат 19:00дан 7:00га қадар газ таъминотини тўхтатиб туриш режалаштирилган эди.

Билдирилишича, ушбу чоралар аҳоли ва ижтимоий соҳа объектларини узлуксиз табиий газ билан таъминлашга қаратилган. Бунга сабаб истеъмолнинг юқори (пик) соатларида ёқилғи қуйиш шохобчаларидаги газ истеъмоли туфайли босим камайиб кетади.

«Ҳозирги кунда ушбу чекловчи чораларни қўллаш механизми қайта кўриб чиқилмоқда ва қабул қилинган хулосалар ҳақида ўз вақтида маълумот берилади», – дейилади вазирлик маълумотида.

Аввалроқ Энергетика вазирлиги хўжалик юритувчи субъектларнинг табиий газдан фойдаланишига доир чекловлар зарур чора ҳисобланишини билдирганди.