Ҳудудларда ўз хусусияти ва касалликлар таркибига қараб даволаш муассасалари ташкил этилади

Президент Шавкат Мирзиёев ўзи раислигида ўтказилаётган йиғилишда ҳар бир ҳудуд ўз хусусиятлари, касалликларнинг таркибига қараб, аниқ касалликлар бўйича хусусий секторни жалб қилган ҳолда даволаш муассасаларини ташкил этиши зарурлиги ҳақида гапирган.

«Мисол учун, республика бўйича ҳар юз минг кишига Фарғона ва Сирдарёда нафас аъзолари, Қашқадарё эндокрин, Тошкент шаҳрида ошқозон-ичак, Андижонда юрак-қон томир, Қорақалпоғистон ва Хоразм буйрак касалликлари энг кўп қайд этилган.

Шунинг учун Қорақалпоғистон ва Хоразмда – буйрак, Андижон – кардиология, Бухоро ва Навоийда – ошқозон-ичак, Жиззах ва Сирдарёда – нафас йўллари, Қашқадарё ва Фарғонада – эндокрин, Самарқандда – гепотология, Наманган ва Сурхондарёда – асаб ва қон айланиши тизими, Тошкент вилоятида – офталмология, Тошкент шаҳрида – онкология касалликлари бўйича илғор хорижий клиникалар филиалларини ташкил этишимиз керак», деган давлат раҳбари.

Kun.uz мухбири хабар беришича, президент бу борада бўш турган коллеж ва лицейларнинг биноларидан фойдаланиш кераклигини айтган.

Таъкидланишича, ҳар бир вилоят ҳокими келгуси йил 1 июнга қадар ўз ҳудудида ташкил этилган ихтисослашган хорижий клиникалар фаолияти бўйича президентга ахборот беради.