Hyundai роботлар ишлаб чиқарувчи Boston Dynamics компаниясини сотиб олди

Hyundai 2025 йилга келиб робототехникага 1,5 трлн вонгача (1,4 млрд доллар) инвестиция киритишни режалаштирган.

Фото: Boston Dynamics

Кореянинг Hyundai автоконцерни Япониянинг SoftBank холдингидан роботлар ишлаб чиқарувчи Boston Dynamics компаниясини сотиб олди. Бу ҳақда The Korea Economic Daily нашри хабар берди.

Нашрнинг ёзишича, шартнома қиймати 1 триллион вонга яқин (921 млн доллар атрофида). Қайд этилишича, Hyundai Motor шартнома қийматининг ярмини тўлайди, қолган қисмини эса унинг шуъба компаниялари тўлайди.

The Korea Economic Daily нашрининг қайд этишича, Hyundai 2025 йилга келиб робототехникага 1,5 трлн вонгача (1,4 млрд доллар) инвестиция киритишни режалаштирган. Аввалроқ Hyundai Motor раиси ўринбосари Эйсун Чунг келгусида концерн бизнесининг 20 фоизи роботлар ишлаб чиқаришга тўғри келишини айтганди.

Hyundai ҳозирда саноат роботларини ишлаб чиқармоқда. Bloomberg агентлигининг ёзишича, Boston Dynamics кўпроқ тадқиқот ташкилотини эслатади, у «технологик илғор, антиқа, лекин норентабел» машиналар ишлаб чиқаради.