Трамп тарафдорлари унинг “инаугурация”сини ўтказишмоқчи

АҚШнинг амалдаги президенти Доналд Трампнинг минглаб тарафдорлари сайланган президент Жо Байден инаугурацияси куни Трампнинг “иккинчи инаугурацияси”ни виртуал тарзда ўтказишмоқчи.   

Facebook’даги саҳифада 60 мингдан кўпроқ киши “Доналд Трампнинг иккинчи инаугурацияси маросими” деб аталган тадбирда иштирок этиш истагини билдирган. Яна 260 минг киши тадбир саҳифасида унга “қизиқаётгани” ҳақида белги қўйган.

“Биз президент Доналд Трампни қўллаб-қувватловчи 325 минг кишидан иборат гуруҳмиз. Биз бирор-бир расмий ташкилотга ҳеч қандай алоқамиз йўқ”, дейилган саҳифада. 

Таъкидланишича, тадбирни 20 январ куни ўтказиш режалаштирилган. Худди шу кун Байден ҳам президентликка қасамёд келтиради.  

Facebook ижтимоий тармоғи “Трампнинг инаугурацияси” эълон қилинган саҳифада “Жо Байден – сайланган президент. Унинг АҚШнинг 46-президенти сифатидаги инаугурацияси 2021 йил 20 январда ўтади” деб эслатиб кетилган.     

Байден АҚШда 3 ноябрда ўтган президент сайловлари ғолиби деб эълон қилинди. Амалдаги президент Трамп ҳанузгача ўз мағлубиятини тан олмаяпти ва судлар орқали сайловлар натижалари бўйича даъволашишни давом эттирмоқда.