Британияда коронавирус юқтириш бўйича кунлик рекорд янгиланди. АПЛ яна тўхтатилиши мумкин

Британияда коронавирус юқтириш ҳолатлари бўйича кунлик рекорд янгиланди.

Ортда қолган бир кун давомида Британияда 55 минг 892 кишида коронавирус аниқланди. Бу вирус аниқланиши бўйича қиролликдаги кунлик рекорд ҳисобланади. Олдинги рекорд 29 декабр куни қайд этилган ва ўша куни 53 минг 135 кишида вирус аниқланганди. 31 декабрда Британияда кун бўйи 964 киши вирус қурбонига айланди.

1 январ куни Британияда кунлик рекорд яна ўсиши мумкин. Чунки Лондон вақти билан 18:00 ҳолатида қиролликда 53 мингдан ортиқ одам вирус юқтиргани аниқланган. Ёмон томони шундаки, аксар британияликлар коронавируснинг мутацияга учраган янги турини юқтирмоқда. Бу эса шифокорлар учун ноқулайлик туғдиряпти.

Британия бўйлаб карантин қоидалари амалда. Футбол бўйича Англия чемпионати яна тўхтатилиши мумкин. Ҳозиргача «Тоттенҳэм» ва «Манчестер Сити» иштирокидаги иккита учрашув қолдирилди. Янги йилни ҳам мамлакат аҳолиси карантин чекловлари билан кутиб олди. Борис Жонсон янги йил табригида келаси йил британияликлар 2020 йилдаги чекловлардан қутулишига ишонч билдирди.

Қиролликда вакцинация жараёнлари ҳам ўзгартирилди. Унга кўра, вакцинанинг биринчи дозасини олганлар иккинчи дозани белгиланганидек уч ҳафтадан кейин эмас, уч ойдан кейин олиши белгиланди. Бу эса одамларнинг кескин норозилигига сабаб бўлди, чунки миллиондан ортиқ британияликлар биринчи дозани олиб бўлган.

Британияда бугунгача 2,5 миллиондан ортиқ одамда коронавирус аниқланган. Вирус 74 мингдан ортиқ британияликнинг ўлимига сабаб бўлди. Қироллик ҳозиргача 55 миллионга яқин фуқаросини коронавирусга тестдан ўтказган.