Шерзод Ҳидоятов: Қурилиш тендерларидаги таклифлар электрон очилади

Ўзбекистонда 36 мингдан ортиқ қурилиш-пудрат ташкилотлари мавжуд бўлиб, шуларнинг 12 мингтасида 1 нафар ишчи ходим рўйхатдан ўтган. Бу “Шаффоф қурилиш” тизими орқали аниқланган. Эндиликда, қурилиш тендерларидаги таклифларнинг ошкор этилиши электрон тарзда амалга оширилади.

Бугунги кунда Ўзбекистонда 36 минг 198та қурилиш-пудрат ташкилоти фаолият юритаётган бўлиб, шундан 12 мингтасида бир ишчи рўйхатга олинган. Бу ҳақда Қурилиш вазирининг биринчи ўринбосари Шерзод Ҳидоятов АОКАда бўлиб ўтган тадбирда маълум қилди.

Қурилиш-пудрат ташкилотлари рейтинги ҳақида сўз юритилди. Ҳокимларнинг, бошқа мансабдорларнинг яқинлари эса, қурилиш ташкилотлари очиб олган, уларнинг имкониятлари кенгроқ, улар шу боис бу рейтингда яна юқори ўринларни олиб, тендерларни ютаверадими? Рейтингнинг адолатли бўлиши қандай таъминланади?

«Рейтингда 64та кўрсаткич бор. Унда қурилиш ташкилотининг ишчи сони, амалга оширган ишлари, мутахассислари, молиявий ҳисоботлари, бажарган ишларининг сифати, назорат инспекциясидан олган талаблари кабиларнинг барчаси қамраб олинган.

Қолаверса, рейтинг тизими Солиқ ва Статистика қўмиталарига, Бандлик ва меҳнат вазирлигига, Ўзстандарт агентлиги, буюртмачи ҳамда Қурилиш вазирлигининг Назорат инспекциясига ўзаро боғланган бўлади. Қурилиш ташкилотлари эндиликда инсон омили билан баҳоланмайди.

Бундан буёғига таклиф очилиши 100 фоиз рақамлашди. Тендер тизими рейтинг тизимига боғланган. Шу боис, тендерда ютиб олиши қурилиш ташкилотининг салоҳиятига боғлиқ бўлади.

Шунга кўра, электрон тендерда кимнингдир таниши деган нарсага йўл қўйилмайди. Масалан, Андижон вилоятидаги бирор иншоотни Наманган ёки Тошкентдаги пудрат ташкилоти ҳам ютиб олиши мумкин.

Шундай экан, бу ташкилот эртага қурилишини сифатли қуради, чунки унинг рейтинги қурган иншооти сифатига боғлиқ бўлади», - деди вазирнинг биринчи ўринбосари.

У, шунингдек, тизим ишга туширилганда қатор қурилиш ташкилотларидаги ишчилар сони ҳам намоён бўлганига ойдинлик киритди.

«Бу тизимни ишга туширгандан кейин, турли тамойилларни синаб кўраётганда, бир кўрсаткич орқали қурилиш ташкилотларини саралаб кўрдик. У ҳам бўлса ишчи кучига доир рақамларни текширдик.

Бештагача ишчиси бор қурилиш ташкилотларини саралаганимизда, бир нафар ишчиси бор қурилиш ташкилотлари 12 мингдан ортиқлиги маълум бўлди. Эндиликда, рейтинг тизими Меҳнат вазирлигига боғлангани учун неча нафар қонуний ишга олинган ишчилари борлиги, улар учун солиқ тўлаётгани ҳам кўринади, бу унинг рейтингига таъсир қилади. Хуфёна иқтисодиётнинг ҳам олдини олади», - дея таъкидлади Шерзод Ҳидоятов.