Эрон коронавирусга қарши иккинчи вакцинасини тақдим этди

Яқин кунларда Razi илмий-тадқиқот институти вакцинасини одамларда синовдан ўтказиш бошланади.

Фото: AFP via Getty Images

Эрон ҳукумати коронавирусга қарши Razi Cov Pars деб номланган иккинчи вакцинасини тақдим этди. Бу ҳақда Эрон вакциналар бўйича миллий қўмитаси маълум қилди, деб хабар бермоқда AFP.

"Яқин кунларда, узоғи билан бир ҳафтадан кейин одамларда синовдан ўтказишни бошлаймиз", - деди Эрон вакциналар бўйича миллий қўмитаси аъзоси Масуд Сулаймоний.

Унинг маълум қилишича, Razi Cov Pars деб номланган вакцина Razi илмий-тадқиқот институти томонидан ишлаб чиқилган.

Клиник синовларнинг биринчи босқичида 18 ёшдан 55 ёшгача бўлган 13 нафар кўнгилли иштирок этади.

Хабар қилинишича, Эрон ўзининг биринчи маҳаллий вакцинасини декабр охирларида синовдан ўтказишни бошлаган.

Эрон соғлиқни сақлаш вазирлиги маълумотларига кўра, мамлакатда коронавирус юқтириш билан боғлиқ ҳолатлар сони 1,4 миллионга яқинлашган, 58,5 мингдан ортиқ киши касалликдан вафот этган.

Тайёрлаган Дилшод Аскаров

#Эрон #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.