Чехияда оғир эпидемиологик вазият юзага келди

Мамлакат жон бошига коронавирус юқтириш даражаси бўйича дунёда биринчи ўринни эгаллаб турибди. Аҳолиси 10,5 млн кишини ташкил этувчи республикада коронавирусдан вафот этганлар сони 20 мингдан ошди.

Фото: David W Cerny / Reuters

Маълумот берилишича, Чехия шифохоналарида қарийб 8,2 минг нафар бемор ётибди. Мамлакатда бир сутка ичида 16 мингдан ортиқ янги касалланиш ҳолатлари аниқланган.

«Вазият жиддий. Инқирозли сценарий ҳақиқатга айланди. Беморларни ётқизиш ва даволашда халқаро ёрдам олиш бўйича музокара олиб бормоқдамиз», деди бош вазирнинг биринчи ўринбосари, инқирозли вазиятларни бартараф этиш бўйича марказий штаб раиси Ян Гамачек.

Мамлакат ўтган йилнинг кузидан буён кескин чекловлар шароитида яшамоқда. Ресторан ва қаҳвахоналар фақат таом етказиб бериш учун ишламоқда, озиқ-овқат дўконларидан бошқа дўконлар, боғча ва мактаблар ёпилган, кеч соат тўққиздан тонгги бешгача комендантлик соати жорий этилган.

Феврал охиридан буён жамоат жойларида устма-уст иккита ниқоб ёки респиратор тақиш мажбурий этиб белгиланган.

Кўрилаётган чораларга қарамасдан, касалланиш ҳолатлари ўсмоқда. Мамлакатда касалликка чалинганлар сони 1,3 млн нафарга яқинлашган.