Moderna ўз вакцинасини болаларда синовдан ўтказишни бошлади

АҚШнинг Moderna компанияси коронавирусга қарши mRNA-1273 вакцинасини 6 ойлик болалардан 12 ёшгача болаларда синовдан ўтказишни бошлади. Синовларда АҚШ ва Канадада 6750га яқин бола иштирок этиши режалаштирилган.

Фото: elements.envato.com

KidCOVE деб номланган синовлар АҚШнинг Аллергик ва юқумли касалликлар миллий институти (NIAID) ҳамда Соғлиқни сақлаш ва ижтимоий хизматлар вазирлигининг Истиқболли биотиббий тадқиқотлар бошқармаси (BARDA) билан биргаликда ўтказилмоқда.

Вакцинанинг клиник синовлари вақтида унинг хавфсизлиги, икки дозасининг самарадорлиги баҳоланади. Дозалар 28 кунлик интервал билан киритилади.

Биринчи босқичда 2 ёшдан 12 ёшгача болаларга иккита дозировкадан (50 ёки 100 микрограмм) биттаси, 6 ойлик болалардан 2 ёшгача болаларга эса учта дозировкадан (25, 50 ёки 100 микрограмм) биттаси киритилади. Сўнгра мутахассислар иккинчи босқичда қайси дозировка қўлланишини аниқлаш учун оралиқ таҳлилларни олишади. Иккинчи эмлашдан кейин иштирокчилар ортидан бир йил давомида кузатув олиб борилади.