Эрдўған Туркияда карантин чоралари кучайтирилганини эълон қилди

Туркия президенти Ражаб Тоййиб Эрдўған эпидемиологик вазият ёмонлашгани сабабли мамлакатда карантин чоралари кучайтирилишини эълон қилди.

 «Энди соат 19:00 дан 05:00 гача кўчага чиқиш тақиқланади. Шунингдек, фуқароларимизнинг зарур бўлмаса шаҳарлараро сафарга чиқишини тўхтатиб туришга қарор қилинди», — дея унинг сўзларидан иқтибос келтиради Gercek Gundem.

Бундан ташқари, фитнес-клуб ва спорт муассасалари фаолияти тўхтатилади, қаҳвахона ва ресторанлар фақат таом етказиб бериш усулида ишлайди. Оммавий тадбирлар ўтказиш тақиқланади.

 Янги чоралар 14 апрелдан кучга киради.

 Worldometer сайти маълумотларига кўра, Туркияда коронавирус юқтириш билан боғлиқ ҳолатлар сони 3,9 миллиондан ошган, 34,1 мингдан ортиқ бемор вафот этган.