Оқ уй АҚШ Лукашенкони йўқ қилмоқчи бўлганини рад этди

Оқ уй матбуот котиби Жен Псакининг таъкидлашича, АҚШ ҳукуматини Беларусь президенти Александр Лукашенкога суиқасд қилмоқчи бўлганликда гумон қилишга ҳеч қандай асос йўқ.

«Бундай айбловлар қўйишга ҳеч қандай асос йўқлигини тасдиқлашим мумкин», деб жавоб қилган Псаки журналистларнинг ушбу вазиятга изоҳ бериш илтимосига жавобан.

Беларусь етакчиси 17 апрелда унга ва унинг ўғилларига суиқасд қилишмоқчи бўлгани ва бунга АҚШ махсус хизматлари алоқадорлигини айтган. Лукашенконинг таъкидлашича, уни йўқ қилишни АҚШнинг олий сиёсий раҳбарияти маъқуллаган.

Ўша куниёқ Россия Федерал хавфсизлик хизмати Беларусда 9 май кунига режалаштирилган давлат тўнтарувига уринишнинг олдини олишда ёрдам берганини маълум қилган.

Таъкидланишича, Лукашенко ва унинг оиласига суиқасд қилмоқчи бўлган бир гуруҳ шахслар қўлга олинган. Гуруҳга беларуслардан ташқари, хорижий фуқаролар ҳам кирган. Беларусь Давлат хавфсизлик қўмитасида ушбу шахслар нафақат Лукашенкони ўлдирмоқчи бўлгани, балки ҳокимиятни эгаллаб олишни режалаштиргани маълум қилинган.

21 апрелда Россия президенти Владимир Путин Ғарб давлатлари Лукашенкога тайёрланган суиқасдни эътиборсиз қолдирганини айтган.

«Беларусь президенти Лукашенко Александр Григорьевичнинг сиёсати борасида ҳар қандай нуқтайи назарга эга бўлиш мумкин. Бироқ давлат тўнтаруви амалга ошириш, сиёсий қотилликлар содир этиш, жумладан, давлат раҳбарларига суиқасдлар режалаштириш – бу энди ҳаддан ташқари. Барча чегаралардан чиқиб кетишди», деб айтган Путин.