Оқ уй Байден ва Путин учрашувида муҳокама қилинадиган мавзуларни маълум қилди

АҚШ президенти Жо Байден Россия президенти Владимир Путин билан учрашув чоғида Украинадаги низо ва Алексей Навальний билан боғлиқ вазият мавзусини кўтариши мумкин. Бу ҳақда Оқ уй матбуот котиби Жен Псаки маълум қилди.

Псакининг билдиришича, икки давлат етакчилари ўртасидаги учрашув ҳозирча тасдиқланмаган ва саммит ҳақида келишилганидан сўнг мулоқот мавзулари янада ойдинлашади.

«Албатта, биз ҳали ҳам Алексей Навальнийнинг тутқунликда эканидан ва Украина билан чегарада Россия қўшинлари кўпайишидан хавотирдамиз», — деди Псаки.

Шу билан бирга, Оқ уй матбуот котиби Вашингтон Москва билан ҳамкорлик қилишга тайёрлигини таъкидлади.

13 апрел куни Байден Путин билан телефон орқали мулоқот чоғида уни нейтрал мамлакатда учрашишга чақирганди. Ўшанда Жен Псаки президентлар ёз фаслида учрашиши мумкинлигини айтганди.