Самарқандда содир бўлган ЙТҲда пиёда вафот этди

Самарқанд вилояти Жомбой туманида содир бўлган йўл-транспорт ҳодисасида пиёда вафот этди. У йўлнинг белгиланмаган жойидан кесиб ўтаётганида машина уриб юборган. Бу ҳақда вилоят ИИБ ахборот хизмати хабар бермоқда.

Маълум қилинишича, жорий йил 18 май куни тонгги соат 03:00 ларда М39 Алмати-Тошкент-Термиз халқаро автомобил йўлининг Жомбой тумани «Зарафшон» МФЙ Ўртабўз қишлоғидан ўтувчи 1078-километрида одам ўлими билан боғлиқ ЙТҲ рўй берган. Каттақўрғон шаҳрида яшовчи 33 ёшли шахс ўзига тегишли бўлган «Кобальт» машинасини Самарқанд-Тошкент йўналишида бошқариб кетаётиб, М39 автомобиль йўлининг белгиланмаган жойдан кесиб ўтаётган, ёши 55-60 лар атрофида бўлган пиёдани уриб юборган.

Оқибатда, пиёда оғир тан жароҳатлари олиб, воқеа юз берган жойда вафот этган.