Россия АҚШ билан саммит ўтказилишини тасдиқлади

Россия хавфсизлик кенгашининг билдиришича, саммит ўтказилиш муддати ва жойи тўғрисида қўшимча эълон қилинади.

Жо Байден ва Владимир Путин / Фото: ТАСС

Женевада Россия хавфсизлик кенгаши котиби Николай Патрушев ва АҚШ президентининг миллий хавфсизлик бўйича ёрдамчиси Жейкоб Салливан ўртасида учрашув бўлиб ўтди.

Россия хавфсизлик кенгаши хабарида айтилишича, ушбу учрашув «19 май куни Сергей Лавров ва Энтони Блинкен ўртасида ўтказилган учрашувнинг мантиқий давоми бўлди».

Икки давлат ташқи ишлар маҳкамалари раҳбарларининг учрашуви Исландия пойтахти Рейкьявикда бўлиб ўтганди.

Хабар қилинишича, Россия АҚШ билан саммит ўтказилишига расман рози бўлди.

«Женевада ўтказилган учрашув режалаштирилаётган Россия-Америка саммитига тайёргарлик йўлида муҳим босқич бўлди, саммит ўтказилиш муддати ва жойи тўғрисида қўшимча эълон қилинади», дейилади хабарда.

Аввалроқ Владимир Путин Жо Байденнинг учрашув ўтказиш тўғрисидаги таклифини қабул қилганини на Кремл, на Россия ТИВ тасдиқлаганди.