Марказий разведка бошқармаси америкалик қўшинларнинг 1961 йилда Кубадаги ғалабаси ҳолатида ҳарбийларни тақдирлаш учун мўлжалланган танга суратини эълон қилди.
«Танга ғалаба муқаррарлигига ишониб тайёрланган, бироқ ўша амалиёт муваффақиятсизликка учраган», деб айтилган МРБда.
Кумуш танга Кубадаги ғалабадан кейин топширилиши керак бўлган. Унинг олд томонида Озодлик ороли ва мағлуб этилган Куба етакчиси Фидел Кастро олдидан ўтиб кетаётган десантчи, орқа томонида эса Куба байроғи ҳамда хоч тасвирланган.
Шунингдек, эсдалик тангасида испан ва инглиз тилларида «Ғалабадан бўлак якун йўқ», деб ёзилган.
1961 йил апрелда АҚШ Куба раҳбариятини ағдаришга уринишни амалга оширган. Бу мақсадда оролга кубалик муҳожирлардан ташкил топган ҳарбий десант ташланган. Уларга АҚШ авиацияси ва флоти кўмак кўрсатган.
Бироқ Фидел Кастро тузумининг тезкор жавоби эвазига Куба армияси 5 кун ичида душман қўшинларини йўқ қилишга ва асир олишга муваффақ бўлган.
Ўшанда Куба ҳукумати етказилган зарарни 53 млн долларга баҳолаган. Ушбу воқеалардан 1,5 йил ўтиб, Вашингтон асирларни ортга қайтариш эвазига Кубага ушбу суммага тенг дори-дармон ва озиқ-овқат маҳсулотларини жўнатган.
