Чехия бош вазири Европарламентни мамлакатнинг ички ишларига аралашишда айблади

Бабишнинг сўзларига кўра, Европарламентнинг уни ЕИ субсидияларидан нотўғри фойдаланишда танқид қилган резолюцияси нафақат унга, балки бутун Чехияга қарши қаратилган.

Чехия бош вазири Андрей Бабиш Европарламентни мамлакатнинг ички ишларига аралашишда айблади. У бу ҳақда Twitter саҳифасида ёзди.

Бабишнинг сўзларига кўра, Европарламентнинг уни ЕИ субсидияларидан нотўғри фойдаланишда танқид қилган резолюцияси нафақат унга, балки бутун Чехияга қарши қаратилган. Чехия бош вазирининг фикрича, ҳужжат кузда бўлиб ўтадиган сайловларга таъсир кўрсатишга уринишдан бошқа нарса эмас.

Сиёсатчи шунингдек, бутун бошли резолюция — ёлғон, Европарламент эса чехларга уларнинг бош вазири ким бўлиши кераклигини ўргатишга уринаётганини айтди.

«Чех Республикаси Европа парламентининг колонияси эмас», — деб таъкидлади Бабиш.

Май охирларида Прага полицияси Бабишни Евроиттифоқ ажратган субсидиялар борасида товламачилик қилганликда айблашни тавсия қилганди. Суриштирув Бабишнинг қариндошларига тегишли Agrofert ҳолдинги таркибидаги ферма билан боғлиқ. Ферма илгари Бабишга тегишли бўлган. Agrofert 250дан ортиқ компанияни бирлаштиради ҳамда кичик ва ўрта бизнес учун мўлжалланган субсидияларни олган. Бабиш бу ишга алоқадорлигини рад этган.