Туркияда бугундан бошлаб қандай чекловлар бекор қилинди?

Комендантлик соати бутунлай бекор қилинди

Covid-19 эпидемиясига қарши кураш доирасида кечқурун 22:00 дан 05:00 гача қўлланилган комендантлик соати кеча охирги марта амалда бўлди.

Ички ишлар вазирлиги томонидан эълон қилинган янги нормаллашиш жараёни билан боғлиқ кўрсатмаларга кўра, барча корхоналар лицензияда қайд этилган вақтга мувофиқ ҳолда очиқ қолади, комендантлик соати эса бутунлай бекор қилинади.

Қайд этиш жоиз, 21 июнь куни президент Ражаб Тоййиб Эрдўған бошчилигида бўлиб ўтган Вазирлар Маҳкамасининг йиғилишида ҳолатлар сонининг камайгани ва эмлаш дастури тезлашгани сабабли июлдан сўнг нормаллашув жараёнига ўтишга қарор қилинганди.

Шаҳарлараро саёҳатларга тақиқ борми?

Бекор қилинган яна бир чеклов шаҳарлараро саёҳатлар билан боғлиқ.

Комендантлик соати амалда бўлган вақт ва кунларда шахсий транспортларда фақат махсус рухсат билан амалга оширилаётган шаҳарлараро саёҳатларга ҳам эркинлик берилди.

Кўрсатмада қайд этилишича, «2021 йил 1 июль, пайшанба куни соат 05:00 дан эътиборан, иш куни ёки дам олиш куни бўлишидан қатъи назар, комендантлик соати ва шаҳарлараро саёҳат чекловлари бекор қилинади ва ушбу санадан эътиборан комендантлик соати ва шаҳарлараро саёҳат чекловлари қўлланилмайди».

Жамоат транспорти қай тартибда ишлайди?

Бекор қилинган яна бир чеклов жамоат транспорти билан боғлиқ. Бугун, эрталаб соат 05:00 дан эътиборан, шаҳар ва шаҳарлараро жамоат транспорти воситаларида йўловчиларга қўйилган чеклов ҳам бекор қилинди.

Бундан ташқари, 65 ёшдан ошган ва 18 ёшга тўлмаган шахсларнинг жамоат транспортидан фойдаланишига қўйилган тақиқлар ҳам бекор қилинди.

Қаерлар очиқ бўлади?

Ички ишлар вазирлиги чилим сотувчилардан ташқари, ўз фаолиятини тўхтатиб турган барча корхоналар 1 июлдан бошлаб ўз фаолиятини қайта бошлаши мумкинлигини билдирди. 

Кўрсатмага мувофиқ:

• кинотеатрлар фаолият юритади;
• овқатланиш жойларининг ёпиқ ёки очиқ қисмларида бир вақтнинг ўзида бир столда ўтирадиганлар сонига чекловлар қўйилмайди;
• ўйинлар ўтказиладиган иш жойларида ўйинлар ўйнаш/ўйнатиш бўйича мавжуд чекловлар бекор қилинади;
• барча иш жойлари лицензиядаги фаолият соҳасига мувофиқ, тегишли маъмурият томонидан белгиланган очилиш-ёпилиш соатлари доирасида хизмат кўрсатади;
• ушбу масала бўйича янги қарор қабул қилингунга қадар соат 24:00 гача мусиқий эшиттиришлар (шу жумладан, жонли ижро) қилиниши мумкин;
• парклар, боғлар, лагерлар, пикник/дам олиш масканларига оид чекловлар ҳам бекор қилинади.

Никоҳ ва тўй маросимлари қай тартибда ўтказилади?

Никоҳ ва тўй маросимларига қўйилган чекловларнинг ҳам муҳим қисми бекор қилинди.

Ички ишлар вазирлигининг кўрсатмасига мувофиқ, энди никоҳ ва тўй маросимларида озиқ-овқат ва ичимлик хизматини кўрсатишга рухсат берилди, мусиқа садолари эса соат 24:00 га қадар янграши мумкин.

Бундан ташқари, бундай маросимлардаги иштирок этувчи шахсларнинг сонига қўйилган чеклов ҳам олиб ташланди.

«Эпидемияни назорат қилиш қўлланмасидаги «Тўй маросимлари пайтида ижтимоий масофа сақлаш имконсиз бўлган ўйинлар, рақслар ёки намойишлар ўтказилмаслиги керак» деган қоида бўйича Соғлиқни сақлаш вазирлиги изоҳ берди. Вазирлик «янги тавсия олингунга қадар никоҳ ва тўйларда рақс ёки намойишлар фақат ижтимоий масофа қоидасини бузмайдиган тарзда ўтказилиши мумкин»лигини маълум қилди.  

Умумий йиғилиш, концерт ва фестивал каби тадбирлар очиқ жойларда бир кишига 4 квадрат метр, ёпиқ жойларда эса 6 квадрат метр майдонни ажратиш шарти билан ўтказилиши мумкин.

Кўрсатмадан яна қандай тартиблар ўрин олган? 

Кўрсатмада, шунингдек, давлат муассасалари иш вақтининг одатий тартибга қайтиши ва чегара дарвозаларида амалга ошириладиган баъзи янги қоидалар ҳам ўрин олган.

Ушбу қоидаларга кўра:

• турар жой биноларига оид чекловлар бекор қилинди;
• турар жой бинолари (ресторанлар, клублар ва бошқалар) ичида гавжумликнинг олдини олиш ва ижтимоий масофа қоидаларига риоя қилиниши бўйича чоралар кўрилади;
• давлат муассасалари ва ташкилотлари нормал иш тартибига қайтади;
• Бангладеш, Бразилия, Жанубий Африка, Ҳиндистон, Непал ва Шри-Ланкадан Туркияга келганлар ва сўнгги 14 кунда ушбу мамлакатларда бўлганлиги аниқланганлар учун мажбурий карантин амалиёти тугатилади;
• Афғонистон ва Покистондан Туркияга келган ва охирги 14 кунда ушбу мамлакатларда бўлганлиги аниқланган шахслар учун мажбурий карантин муддати 10 кунга қисқартирилади;

Туркиянинг чегара дарвозаларига киришда 72 соат олдин ўтказилган салбий натижали PCR тести маълумотномасини тақдим эта олмаган Туркия фуқароларига чегара дарвозаларида PCR ёки тезкор антиген тести қўллангандан кейин ўз яшаш манзилларига боришга рухсат берилади. Тести мусбат натижалилар эса ўз яшаш жойларида изоляцияга олинади.

Маълумот ўрнида қайд этиш жоиз, 1 июль ҳолатига кўра, Туркияда 50 млн доза миқдорида эмлаш ишлари амалга оширилди.