ЕИ Литва ва Беларусь чегарасига ўз чегарачиларини жўнатади

Июлнинг биринчи ярмида Литва ҳукумати 800дан ортиқ мигрантларнинг чегарадан ноқонуний ўтиш ҳолатларини қайд этган. Мигрантларнинг аксарияти Конго, Гамбия, Гвинея, Мали ва Сенегал фуқаролари ҳисобланади.

Европа иттифоқининг ташқи чегаралар хавфсизлиги агентлиги («Фронтекс») миграцион инқироз кучайиши сабабли Литва ва Беларусь чегарасида тезкор операция ўтказади. Бу ҳақда агентлик сайтида хабар берилди.

Қайд этилишича, агентлик 1 июл куни Литва-Беларусь чегарасига офицерлар ва қурилмаларини жўнатган.

«Ёрдамни кучайтирамиз ва қўшимча чегарачилар, патрул машиналари ҳамда жиноий тармоқлар тўғрисида маълумот тўплаш мақсадида мигрантлар орасида сўров ўтказиш учун ихтисослашган офицерларни жўнатамиз», — деди агентлик раҳбари Фабрис Лежери.

«Фронтекс» Литва чегарасига ўз чегарачиларини яқин кунларда жўнатиши кутилмоқда. Агентликнинг маълумот беришича, июлнинг биринчи ярмида Литва ҳукумати 800дан ортиқ мигрантларнинг чегарадан ноқонуний ўтиш ҳолатларини қайд этган. Мигрантларнинг аксарияти Конго, Гамбия, Гвинея, Мали ва Сенегал фуқаролари ҳисобланади.

Аввалроқ Беларусь президенти Александр Лукашенко республика Евроиттифоққа йўл олган мигрантларни тўхтатмаслигини айтганди.

"Агар кимдир Польша, Литва, Латвия ва Украина билан чегарани ёпишимизни ва Афғонистон, Эрон, Ироқ, Ливия, Сурия, Тунисдан келадиган қочоқлар маконига айланишимизни ўйлаётган бўлса, у камида адашаётган бўлади. Биз ҳеч кимни ҳеч қачон тўхтатмаймиз: улар бизгамас, ёрқин, илиқ, шинам Европага боришмоқда", — деганди у.

Литва бош вазири Ингрида Шимонитенинг сўзларига кўра, республика мигрантлар оқимини тўхтатиш учун Беларусь билан чегарада девор қуришни мўлжалламоқда.