АҚШда кучли ўрмон ёнғинлари сабабли минглаб одамлар эвакуация қилинди

АҚШнинг Орегон штатида кучли ўрмон ёнғинлари юз бериши оқибатида минглаб одамлар зудлик билан эвакуация қилинди. Бу ҳақда BBC News хабар бермоқда.

Кенг кўламдаги ёнғинлар натижасида камида 160та уй ва хўжалик бинолари куйиб кулга айланган.

Кучли шамол ва қуруқ ҳаво туфайли олов штат бўйлаб тарқалишда давом этмоқда. Ёнғин яна мингга яқин бинога хавф солмоқда.

Уйлари бузилган аҳоли учун вақтинчалик эвакуация марказлари барпо этилди.

Хабарда айтилишича, офатга қарши икки мингга яқин ўт ўчирувчи курашмоқда. Орегондан ташқари, Калифорния, Айдаҳо, Вашингтон ва Монтана штатларида ҳам ёнғинлар юзага келган.

Аввалроқ Россияда 1,5 млн гектардан ортиқ ўрмон ёнаётгани хабар қилинганди.