Олимпиада 2020: Ўзбекистон аёллар ўртасидаги еттикурашнинг жаҳон майдонига қадам босадими?

Токио-2020 ёзги Олимпия ўйинларида иштирок этиши натижасида Ўзбекистон Енгил атлетика федерацияси кўп йиллар мобайнида илк маротаба аёллар ўртасидаги еттикураш бўйича ўзининг позицияларини яхшилашга эришди. Енгил атлетикачи Екатерина Воронина 6 298 очко тўплаган ҳолда дунёнинг 12 та энг кучли еттикурашчиси ўртасида 12-ўринни эгаллади.

Марказий, Жанубий-Ғарбий ва Жанубий Осиё минтақасидан иштирок этган ягона вакил Екатерина Воронина Ўзбекистоннинг бўлажак еттикурашчилари учун эшик очгандай бўлиб, 24 жаҳон спортчиларидан ташкил топган олимпик рейтинг марказидан жой эгаллади.

Токиодаги Олимпиадада еттита йўналиш бўйича икки кун кураш олиб бориб Екатерина югуриш турларида учта шахсий рекордини ўрнатди: юз метрга тўсиқлар оша югуриш, ундан сўнг натижасини 14,27 сонияга оширган ҳолда, 14,19 сонияда уддалади, 24,85 сония ўрнига 200 метрни 24,67 сония ичида югуриб ўтди ва 800 метрга югуришда 2:09.73 дақиқа натижа билан финишга етиб келди. 2020 йилнинг охирида олинган елка жароҳати Воронинанинг Олимпия ўйинларида заиф жойи бўлиб, у найза ва ядро улоқтиришда юқори натижаларни кўрсатишга имконият бермади, бу эса умумий очко пасайишига олиб келди. Зўраки машқларнинг камайтирилиши ва Енгил атлетика федерацияси томонидан кўрсатилган тиббий ёрдамга қарамасдан, елка бўғимининг ҳаракатчанлиги ва букилувчанлиги олимпиаданинг бошланиш пайтигача ҳали бутунлай тикланмаган эди.

Екатеринанинг таъкидлашича, енгил атлетиканинг еттикураш каби машаққатли ва кўп қувват сарфланадиган турида жароҳатлар бўлиши табиий. Зарур бўлган психологик кайфият, ўз ишига бўлган муҳаббат ҳамда мунтазам равишда ишлаш,  ўзингизни такомиллаштириш истагисиз эса иш анча қийинроқ амалга ошади.

«Мен учун еттикурашда иштирок этиш – бу ўз устимдан ғалаба қозониш дегани. Мен деярли ҳар доим натижаларимдан қониқмайман, ҳаттоки шахсий юқори натижани кўрсатганимда ҳам, доимо салбий тарафларини ва нюансларини қидираман. Эҳтимол, ҳаётимдаги энг асосий жумлалардан бири бу - "Мен яхшироқ қила оламан ва мен яхшироқ натижа бўлишини истайман", — деб ўртоқлашди Екатерина. — Олимпия ўйинларида ғалаба қозониб, барча мавжуд жаҳон рекордларини ўрнатганимда ҳам, ўзимга бу ҳали чегараси эмас, деб гапирсам керак. Мен ўзимдан доим кўпроғини талаб қиламан. Ва ушбу кўпкурашдаги асосий рақибим – мен ўзим. Кўпкураш мени янада кучлироқ қилади».

Енгил атлетикада ўзининг профессионал йўлини найза улоқтиришдан бошлаган Екатерина, спортчилар учун анча кеч ҳисобланган 18 ёшда, қизиқишини кўпкураш тарафга йўналтириб, ўн кураш бўйича тажрибали спортчи Павел Андреев билан машқ қилишни бошлади. Жамоада ишлашни бошлагандан атиги уч йилдан сўнг у мукофотли ўринларни эгаллашни бошлади. 2013 йилда Пуна (Ҳиндистон) шаҳридаги Осиё чемпионатида еттикурашда кумуш медални қўлга киритади, 2014 йилда Инчондаги (Жанубий Корея) XVII ёзги Осиё ўйинларида чемпион унвонига эга бўлади, 2015 йилда эса Уҳан (Хитой) шаҳридаги еттикурашда Осиё чемпионига айланади. 2019 йилда Доҳадаги (Қатар) Осиё чемпионатида биринчи ўринни эгаллаган ҳолда, сўзсиз етакчи бўлди. Худди ўша 2019 йилда ва яна ўша Доҳа (Қатар) шаҳрида ўтказилган еттикураш бўйича жаҳон чемпионати Екатеринага дунёнинг энг кучли енгил атлетикачилари – еттикурашчилари орасида 10-ўринни олиб келди ва Токио-2020 Олимпиада ўйинларида иштирок этиши учун унинг бахтли чиптасига айланди.

Ҳа, аёллар ўртасидаги еттикурашда Олимпия ўйинлари давомида устунлик қатъий равишда Бельгия, Нидерландия, Буюк Британия, АҚШ, Австрия, Швециядан спортчиларни томонида эканлиги кўриниб турди. Лондон (2012) ва Рио де Жанейродаги (2016) Олимпия ўйинлари ҳам кўпкураш бўйича ўзбекистонлик енгил атлетикачилар Юлия Тарасова ва Екатерина Воронина учун ушбу спорт турининг пойгасидан чиқиб кетиш билан якунланди.

Бироқ Токиодаги Олимпиада мамлакатда аёллар ўртасидаги кўпкурашнинг ривожланиши учун янги сифатли бошланиш бўлиб хизмат қилди ва Ўзбекистон Енгил атлетика федерацияси олдида янги вазифаларни белгилади.

Ҳозирча эса Катя фақат битта нарсани – тезроқ Тошкентга қайтиб, у учун қайғурган ва ашаддий мухлислари бўлган оила аъзоларини қучоғига олиш ва қизалоғидан: “Ойижон, сен албатта барчасини уддалайсан!” деган сўзларини эшитишни, эртаси куни эрталаб эса яна ўзининг севимли “Пахтакор” машқлар залига йўл олишни истайди.

Сайт:  https://uzathletics.uz/