“Толибон” аёлларнинг уйдан чиқишига қўйилган тақиқ вақтинчалик эканлигини билдирди

“Толибон” ишлайдиган аёллар ҳозирча уйларидан чиқмаслиги кераклиги, кейинчалик ишга қайтишлари мумкинлигини маълум қилди, деб хабар бермоқда ВВС.

“Толибон” вакили Забиҳулла Мужоҳиднинг сўзларига кўра, аёлларга нисбатан қўйилган ҳар қандай чеклов вақтинчалик.

“Хавфсизлик кучларимиз аёллар билан қандай муомала қилиш, улар билан қандай сўзлашиш кераклигини билмайди. Тўлиқ хавфсизликни таъминламагунимизча аёллардан уйда қолишларини сўраймиз”, – деди у.

“Толибон” ҳокимиятни эгаллаганидан кейин ўтказган илк матбуот анжуманида мамлакатда аёллар ҳуқуқлари ҳимоя қилинишини, уларга шариатга риоя қилган ҳолда фаол турмуш тарзини олиб боришга имкон берилишини билдирганди.