Бир неча кун олдин #Kunmobilmuxbiri Тўрткўл тумани «Эламонов» фермер хўжалиги ҳудудидаги мактабга 5-6 ойдан бери интернет симлари тортилмаётгани ҳақида хабар берганди. Мобил мухбирга кўра, ҳудуддаги 20-мактабга интернет олиб кириш учун керакли кабеллар бундан салкам ярим йил олдин олиб келинганди.
Ушбу ҳолат юзасидан «Ўзнектелеком» АК Қорақалпоғистон филиали расмий маълумот берди. Мақолада кўрсатилган тумандаги «Эламонов» фермер хўжалиги ҳудудидаги 20-мактабга 16 км узунликдаги оптик толали кабеллар тортилган. 26 август куни кабелни йўлдан ўтказиш учун автомобиль йўлида қазиш ишлари олиб борилган. 30 август куни ишлар тўлиқ якунига етказилиб, мактаб интернет тармоғига уланган. Бу хабарни #Kunmobilmuxbiri ҳам тасдиқлади. Мобил ишлар якунига етган жойдан таҳририятга буни маълум қилди.
Қўшимча қилинишича, Тўрткўл тумани телекоммуникация тармоғи томонидан 2020-2021 йиллар давомида Туман халқ таълими бўлимига қарашли 69 та мактабга замонавий шиша толали алоқа кабелларини тортиш режалаштирилган. Бугунги кунда ушбу мактабларнинг 61 тасига 97,3 км оптик толали кабеллар тортилган. Қолган мактабларга йил якунига қадар интернет симлари олиб бориш режалаштирилган.
Эслатиб ўтамиз, бундан олдин #Kunmobilmuxbiri ёрдамида Aмударёдаги ярми ўйилиб, ярми қолган кўприкда таъмирлаш ишлари бошланиши ҳақида хабар бергандик.
