Amudaryodagi yarmi o‘yilib, yarmi qolgan ko‘prik ta'mirlanadigan bo‘ldi

Oldinroq #Kunmobilmuxbiri yordamida Amudaryodagi yarmi o‘yilib, yarmi qolgan ko‘prikdan og‘ir yuk mashinalari o‘tayotgani haqida xabar bergan edik. «Jumur ovul» MFY hududidagi ko‘prik ikki oy oldin yaroqsiz holga kelib qolgandi.

Amudaryo tumani hokimligi ushbu holat yuzasidan rasmiy munosabat bildirdi. Hokimlikning qayd etishicha, ko‘prik tuman «Yo‘llardan foydalanish» UK balansida. Uning yaroqsiz holga kelgani yuzasidan tegishli tashkilotlar bilan birgalikda dalolatnomalar rasmiylashtirilgan.

Shuningdek, ko‘prikni ta'mirlash bo‘yicha Qoraqalpog‘iston Respublikasi Avtomobil yo‘llari boshqarmasiga tegishli takliflar taqdim qilingan.

Endilikda ushbu ko‘prikni ta'mirlash bo‘yicha zarur bo‘lgan mablag‘lar ajratilishi bilan ko‘prikni ta'mirlash ishlari amalga oshirilishini ma'lum qilamiz, — deyiladi rasmiy munosabatda.

Eslatib o‘tamiz, bundan oldin #Kunmobilmuxbiri Amudaryo ustida qurilayotgan yangi ko‘prik daryoni qanday jilovlayotgani haqida xabar bergandi.