Польша Беларусь билан чегарада фавқулодда ҳолат режимини киритди

“Речь Посполита” нашрининг маълум қилишича, фармонга кўра чегараолди аҳоли пунктларида оммавий тадбирлар ўтказиш тақиқланади. Бу аҳоли пунктларига уларда яшамайдиган одамлар киролмайди, жумладан, бу тақиқлов журналистларга ҳам тегишли бўлади. Қоидабузарларга нисбатан жарима солиниши ёки улар ҳибсга олиниши мумкин.

Аввалроқ Дуда мудофаа, ташқи ишлар ва ички ишлар вазирлари билан Беларусь чегарасидаги вазият бўйича йиғилиш ўтказган. Польша ички ишлар вазирлигида маълум қилинишича, хар куни 100-250 одам Беларусдан Польша ҳудудига ўтишга уриниб келмоқда. Шу сабабли Польша Беларусь билан чегарада 2,5 метр баландликка эга девор қуришни бошлаган. Девор узунлиги 180 кмга яқинни ташкил қилади. Чегаранинг бир нечта қисмида эса тиканли сим тортилган.

Уч ҳафтадан кўпроқ вақтдан бери Афғонистоннинг 30 га яқин фуқароси Польша ва Беларусь чегарасида қолмоқда. Қочқинларда егулик йўқ, улардан баъзилари касалликка учраган. Инсон ҳуқуқлари учун курашувчи фаоллар чегарада қолиб кетган афғонларга ёрдам бериш учун у ерга йўл олган.

Режим 30 кун давом этади ва узайтирилиши мумкин. У 183 та аҳоли пунктини қамраб олган. Режим оммавий тадбирлар ўтказишга тақиқловни, полиция навбатчилиги ва ҳужжатлар назорати кучайтирилиши мумкинлигини англатади. Литва, Латвия ва Польша Беларусь билан чегараларида ушланаётган ноқонуний мигрантлар сони ошаётганини маълум қилган. Ноқонуний миграция сабабли Литва июлда давлат даражасида экстремал вазият эълон қилган ҳамда Беларусь билан чегарада девор ўрнатишни бошлаган. Шунингдек, Латвия ҳукумати ҳам шу сабабли 10 ноябргача фавқулодда вазият режимини киритган.