2022 йилдан Қашқадарёнинг учта туманида пахта етиштириш тугатилади

2022 йилдан бошлаб Қашқадарё вилоятининг учта туманида пахта етиштириш тугатилади. Бу ҳақда вилоят ҳокимлиги ахборот хизмати хабар бермоқда.

Маълум қилинишича, жорий йил 13 сентябрь куни Халқ депутатлари Қашқадарё вилояти кенгашининг навбатдаги сессияси ўтказилган. Унда бир қатор долзарб масалалар муҳокама қилинган.

Қайд этилишича, сессияда вилоят ҳокими Зойир Мирзаев 2022 йилдан бошлаб вилоятнинг учта туманида пахта етиштириш тугатилишини маълум қилган. Жумладан, Шаҳрисабз, Китоб ва Яккабоғ туманлари мева ва сабзавот етиштиришга мослаштирилади. Бу туманларда пахта майдонлари ўрнига мевали боғлар ташкил этилади, сабзавот етиштирилади.