Самарқанд шаҳрида гиёҳванд моддаларини сотаётган икки нафар шахс ушланган. Улардан бири 66 ёшли шахс бўлган. Бу ҳақда вилоят ИИБ ахборот хизмати хабар бермоқда.
Маълум қилинишича, вилоят ИИБ ва ДХХ томонидан Самарқанд шаҳри Хўжасоат маҳалласида тезкор тадбир ўтказилган. Тадбирда 66 ёшли фуқаро 6 дона целлофан пакетга ўралган, оғирлиги 20 грамм бўлган опий гиёҳвандлик моддаларини тадбирга жалб қилинган шахсга 100 АҚШ доллари ва 4 миллион 232 минг сўмга келишиб, сотаётган вақтида ушланган.
Мазкур шахс тегишли тартибда тинтув қилинганда, унинг шими чўнтагидан қоғозга ўралган 3 грамм оғирликдаги яшил рангдаги ўткир ҳидли марихуана ва бир дона психотроп дори топилган.
Олиб борилган суриштирувлар давомида қўлга олинган шахс опий гиёҳвандлик моддасини 52 ёшли танишидан олганини маълум қилган. Маълумот бўйича мазкур шахс текшириб кўрилганда унинг машинасидан тадбирда ишлатилган пуллар борлиги аниқланган ва улар ҳужжатлаштириб олинган. Қайд этилишича, ҳозирда ҳолат юзасидан тергов ҳаракатлари олиб борилмоқда.
