БМТда Афғонистонга ёрдам кўрсатиш жамғармаси таъсис этилди

БМТнинг Тараққиёт дастури Афғонистон аҳолисига иқтисодий ёрдам кўрсатиш бўйича махсус жамғарма таъсис этганини эълон қилди.

Фото: AA

Дастур маъмури Ахим Штайнернинг таъкидлашича, Афғонистонга ёрдам бериш бўйича чоралар кўрилмаса, мамлакатдаги 97 фоиз уй хўжаликлари 2022 йил ярмига келиб қашшоқлик ёқасига келиб қолиши мумкин.

“Биз бу вазиятга аралашишимиз, “халқ иқтисодиёти”ни барқарорлаштиришимиз керак. Ҳаётларни сақлаб қолиш бўйича саъй-ҳаракатларимизга қўшимча равишда бу ҳаёт учун маблағ ажратишимиз лозим”, деб айтган Штайнер.

Унинг айтишича, жамғармага Германия биринчи бўлиб 50 млн евро ажратишга ваъда берган.

Афғонистонда ҳокимият тепасига толиблар келгандан кейин иқтисодий ҳолат янада оғирлашган. Жумладан, Афғонистонга тегишли АҚШда сақланувчи пулларнинг катта қисми Вашингтон томонидан музлатиб қўйилган.