Трампнинг ижтимоий тармоғи ҳали ишга тушмасдан туриб ҳакерлар томонидан бузилди

21 октябр куни Доналд Трамп ўзининг TRUTH Social ижтимоий тармоғи яратилганини эълон қилганди.

Фото: Getty Images

АҚШ собиқ президенти Доналд Трампнинг Trump Media & Technology Group (TMTG) компанияси яқинда эълон қилган TRUTH Social ижтимоий тармоғи расман ишга тушмасдан туриб ҳакерлар ҳужумига учради, деб хабар берди The New York Times. Ҳакерлар газетага берган интервьюсида ўзларини Anonymous гуруҳига алоқадор деб таништирган.

Уларнинг таъкидлашича, TRUTH Social яратилгани ҳақидаги хабардан бир неча соат ўтиб, ҳакерлар платформанинг бета-версиясини бузиб киришган. Улар Трамп, унинг собиқ маслаҳатчиси Стивен Бэннон, фитна назарияси тарафдори Рон Уоткинс ва Twitter асосчиси Жек Дорси номларига сохта аккаунтлар очишган.

Ҳакерлар @donaldjtrump аккаунтида чўчқалар сурати ва Дорсининг шаънига ҳақоратомуз сўзларни қолдиришган. Постлар тасвирланган скриншотлар бошқа ижтимоий тармоқларда тарқатилган. TRUTH Social муаллифлари сохта аккаунтларни блоклаган, сўнгра эса платформанинг бета-версиясини ёпишларига тўғри келган, деб ёзади NYT.

Январда Facebook ва Twitter Доналд Трампнинг саҳифасини блоклаб қўйганди. 21 октябр куни Трамп TRUTH Social ижтимоий тармоғи яратилганини эълон қилди. Унинг сўзларига кўра, сервиснинг бета-версияси «таклиф қилинган меҳмонлар» учун ноябрда ишга тушади, 2022 йил бошидан эса ундан барча фойдаланиши мумкин бўлади.

#Доналд Трамп #ижтимоий тармоқлар

Kun.uz янгиликларини Google News'да кузатинг

+ Обуна бўлиш