Беларусь Россиядан Польшага нефть транзитини тўхтатиб қўйди

Беларусь Россиядан Польшага шартнома бўйича юборилаётган нефть транзитини тўхтатиб қўйди. Беларусь томонининг маълум қилишича, Польшага нефть боришини таъминлайдиган «Дўстлик» нефть ўтказгичида кутилмаган кичик таъмирлаш ишлари амалга оширилмоқда.

Россиянинг «Транснефть» компанияси Беларусь Польшага кетаётган транзитни тўхтатиб қўйганини маълум қилди. Ташкилот расмий вакили Игорь Деминнинг айтишича, Беларуснинг «Гомелтранснефть» компанияси кутилмаганда магистрал ўтказгичнинг бир қисмида таъмирлаш ишларини бошлаган.

Деминнинг айтишича, таъмирлаш ишлари уч кун давом этади. Нефть етказиб бериш бўйича ойлик режа эса ўзгармаслиги кутилмоқда. Ўз навбатида «Дўстлик» ўтказгичининг Польшадаги назоратчиси бўлган PERN компанияси бу узилишдан огоҳлантирилганини, ойлик нефть транзитида ўзгариш бўлмаслигини маълум қилган.

11 ноябр куни Беларусь президенти Александр Лукашенко мамлакат чегарасида кузатилаётган миграцион инқироз сабаб Европага кетаётган газни узиб қўйиши мумкинлигини айтганди: «Биз Европани иситяпмиз, улар эса чегарани ёпиш билан таҳдид қиляпти. Биз Европага кетаётган табиий газни ўчириб қўйсак-чи?», деганди таҳдиднамо оҳангда Лукашенко. Россиядан Европага айнан Беларусь орқали «Ямал – Европа» газ ўтказгичи орқали газ боради.

Лукашенконинг гапидан бир кун ўтиб Владимир Путин бу гапдан ажабланиб, олдинроқ Беларусь президенти билан гаплашганда бундай гап бўлмаганини айтганди. Путиннинг матбуот котиби Дмитрий Песков эса «кимга ёқиш ёқмаслигидан қатъи назар» Россиядан Европага газ боришда давом этишини маълум қилганди.

«Дўстлик» нефть ўтказгичи 1964 йилда қурилган. Унинг шимолий қисми Россия, Беларусь, Латвия, Литва, Польша ва Германиядан, жанубий қисми эса Украина, Чехия, Словакия ва Венгриядан ўтади.

Беларусь ва Польша чегарасида Яқин Шарқ мамлакатлари фуқаролари Беларусдан Польша орқали Европа Иттифоқи ҳудудига ўтишга уринаётгани сабаб бир неча ҳафтадан буён вазият жиддий бўлиб турибди. Беларусь томони чегараларни ёпиб олган Польшани бу инқирозда айблаётган бўлса, ғарбда Беларусь ва Россияни муҳожирлар ёрдамида Европага гибрид уруш уюштиришда айблашмоқда.