Ҳиндистон “ер-ер” синфидаги янги ракетани синовдан ўтказди

Ҳиндистон “ер-ер” синфидаги янги авлоддаги ракета Pralay’нинг синовини ўтказди. Бу ҳақда мамлакат мудофаа вазирлиги маълум қилди.

Фото: Reuters

Синовлар Ҳиндистоннинг мудофаа соҳасидаги тадқиқотлар ва ишланмалар ташкилоти (DRDO) томонидан 22 декабрда Абдул-Калам оролидан амалга оширилган. Ракета белгиланган траектория бўйлаб учиб, нишонни аниқ мўлжалга олган.

Маълумотларга кўра, Pralay ракетаси 150 кмдан 500 кмгача таъсир доирасига эга бўлиб, мобил қурилмадан отилиши мумкин.

Ҳиндистон мудофаа вазири Ражнатх Сингх DRDO’ни ракетанинг муваффақиятли синовлари билан табриклаган ва ташкилотга миннатдорлик билдирган. Ўз навбатида, DRDO раҳбари Ратиш Редди янги авлоддаги ракета “Ҳиндистон қуролли кучларини янада мустаҳкамлашга зарур туртки беришини” айтган.