МБ: 2021 йил якунлари бўйича сўм 3,4 фоизга қадрсизланган

Марказий банк бошқарувининг 2022 йил 20 январда асосий ставкани йиллик 14 фоиз даражасида ўзгаришсиз қолдириш тўғрисидаги қарори юзасидан расмий релиз эълон қилинди.

Қайд этилишича, 2021 йил якунлари бўйича инфляция кўрсаткичлари оралиқ мақсадли кўрсаткич – таргет даражасида шаклланиб, 10 фоизни ташкил этган.

Ўтган йил давомида инфляцион муҳитни юзага келтирган асосий омиллар озиқ-овқат ва энергия-ёқилғи маҳсулотлари нархларининг сезиларли даражада ўсиши бўлган. Нархларнинг ўсиши, бир томондан, глобал инфляцион тенденциялар, иккинчи томондан эса, ички бозордаги рақобат ва таклифларга боғлиқ сабаблар билан изоҳланган.

2021 йил якунлари бўйича сўм алмашув курси девальвацияси 3,4 фоизни ташкил этиб, сўнгги уч йилликдаги энг паст кўрсаткични қайд этган.

• Девальвация – миллий пул бирлиги курсининг чет эл валюталарига нисбатан ўз қадрини йўқотиши.

2021 йилда экспортдан тушумлар ва трансчегаравий пул ўтказмаларининг мос равишда 34 фоиздан ошиши, ички валюта бозорида валюта таклифини қўллаб-қувватловчи омил бўлиб, бозордаги умумий таклиф ҳажмини 1,6 баробарга ўсишига хизмат қилган.

«Глобал инфляция давом этаётгани шароитида ташқи бозорларда хомашё ва энергия ресурслари нархларининг ўсиши, пандемик вазият, жаҳонда иқтисодий ўсишнинг секинлашиши билан боғлиқ хатарлар жорий йил якуни бўйича инфляция даражасининг 8-9 фоиз доирасида шаклланиши мумкинлигини кўрсатмоқда.

Шунингдек, 2022 йил якунлари бўйича ялпи ички маҳсулотнинг реал ўсиши 5,5-6,5 фоиз атрофида бўлиши прогноз қилинган. Бунда, ўтган 2020-2021 йилларда иқтисодиётга йўналтирилган фискал рағбатлантиришларнинг 2022 йилнинг биринчи ярим йиллигида ҳам иқтисодий фаолликни қўллаб-қувватловчи асосий омиллардан бўлади», дейилади баёнотда.