Эскроу орқали расмийлаштирилган олди-сотди битимлари ўсишда давом этмоқда

Марказий банк маълумотларига кўра, июн ойидаги битимларнинг 19 минг 241 таси (55,9 фоиз) транспорт воситалари, 15 минг 146 таси (44,1 фоиз) эса кўчмас мулк олди-сотдисига тўғри келган. Яна 834 та битим кўриб чиқилиш жараёнида.

Таққослаш учун, апрел ойида эскроу ҳисобварақлари орқали 31 минг 757 та битим расмийлаштирилган бўлиб, шундан 18 минг 960 таси транспорт воситалари, 12 минг 797 таси кўчмас мулк олди-сотдисига оид бўлган. Ўша пайтда 1 минг 516 та битим жараёнда қолган.

Май ойида эса жами битимлар сони 29 минг 23 тага тушган. Уларнинг 16 минг 584 таси транспорт воситалари, 12 минг 439 таси кўчмас мулк олди-сотдисига тўғри келган, 1 минг 113 та битим эса кўриб чиқилиш босқичида бўлган.

Шундай қилиб, июн ойида нафақат расмийлаштирилган битимлар сони ошган, балки кўриб чиқилиш жараёнидаги битимлар сони ҳам кетма-кет учинчи ой камайишда давом этган. Бу эса аризаларни кўриб чиқиш ва битимларни якунлаш жараёни тезлашганини кўрсатиши мумкин.

Ҳудудлар кесимида етакчилик ўзгармади. Июн ойида Тошкент шаҳрида 9 минг 373 та битим қайд этилиб, бу республика бўйича жами битимларнинг 27,3 фоизини ташкил этди. Апрелда пойтахтда 9 минг 177 та, майда эса 8 минг 575 та битим расмийлаштирилган эди.

Фаоллик юқори бўлган бошқа ҳудудлар қаторида Фарғона вилояти (июн — 3 минг 456 та, май — 2 минг 708 та, апрел — 3 минг 42 та), Самарқанд вилояти (июн — 2 минг 990 та, май — 2 минг 523 та, апрел — 2 минг 766 та) ҳамда Андижон вилояти (июн — 2 минг 737 та, май — 2 минг 383 та, апрел — 2 минг 354 та) қайд этилди.

Натижада май ойидаги қисқа пасайишдан сўнг июнда эскроу ҳисобварақлари орқали расмийлаштирилаётган кўчмас мулк ва транспорт воситалари олди-сотди битимлари сони яна ўсиш траекториясига қайтди.

Эслатиб ўтамиз, эскроу ҳисобварақлари харидор ва сотувчи ўртасидаги ҳисоб-китобларни хавфсиз амалга ошириш механизми бўлиб, маблағлар битим шартлари бажарилгандан кейингина сотувчига ўтказилади.