1925 йилда туғилган Қаҳҳоржон ота Мағрипов Фарғона вилояти Олтиариқ туманининг Янгиқўрғон қишлоғида яшайди. У иккинчи жаҳон урушида иштирок этган. Қаҳҳоржон ота 18 ёшида кўпчилик тенгдошлари қатори фронтга жўнаган.
97 ёшли Қаҳҳоржон ота иккинчи жаҳон уруши даврида бошидан ўтган хотираларни гапириб берди. У жанглардан бирида оёғидан яраланган.
«1943 йил сентябр ойида урушга отландик. Москвага борганимизда бизни «сортировка» қилишди. Мен Белоруссия фронтига тушдим. Июн ойларида Тула шаҳрини, кейин эса Минск, Брест шаҳарларини озод қилдик.
Бир қанча шаҳарлар душман қўлидан озод этилгач, Венгрияга ўтдик. Венгрияда оёғимдан яраландим. Ўша ерда госпиталда ётиб даволандим.
Жанглардан бирида немис танкининг ичига тушиб олиб, немис танки билан немис танкларини отавердим. 20 дан ортиқ душман танкларини вайрон қилдик. Мана шу жасорат учун Қизил юлдуз ордени беришди», — дейди Қаҳҳоржон ота Мағрипов.
Қаҳҳоржон ота урушга 1943 йилда кетиб, 1950 йилда қайтиб келган. У фронтдан қайтгач, уйланган. Жўрак қишлоғида физика фанидан ўқитувчилик қилиб, 5 ўғил ва бир қизни вояга етказган.
Сарвар Зияев, Kun.uz мухбири.
Монтаж устаси: Жаҳонгир Алибоев.
