Буюк Британия мудофаа вазири музокара ўтказиш учун Москвага келди

Бир кун аввал Британия ташқи ишлар вазири Лиз Трасс Москвада Россия ташқи ишлар вазири Сергей Лавров билан музокара ўтказганди.

Фото: Reuters

Буюк Британия мудофаа вазири Бен Уоллес расмий ташриф билан Москвага келди. Бу ҳақда Бирлашган Қиролликнинг Москвадаги элчихонаси хабар берди.

Уоллес россиялик ҳамкасби Сергей Шойгу билан музокара ўтказади.

Британия ОАВнинг маълумот беришича, Уоллес Шойгу билан учрашувда Россиянинг Украинага бостириб кириши ҳеч ким ғалаба қозонмайдиган қадам бўлиши ҳақида огоҳлантиради.

10 феврал куни Буюк Британия ташқи ишлар вазири Лиз Трасс Москвада Россия ташқи ишлар вазири Сергей Лавров билан музокара ўтказганди.

Лавров Британия ташқи ишлар вазири билан музокараларни «кар ва соқовнинг суҳбати» деб атади.