Байден Путинни яна бир бор огоҳлантирди

Россия президенти Владимир Путин ва АҚШ президенти Жо Байден ўртасида телефон орқали мулоқот бўлиб ўтди, деб хабар берди Reuters.

Байден Путинни Украинага «бостириб кириш»ни давом эттириш Москва учун жиддий оқибатларга ва Россиянинг позицияси заифлашишига олиб келиши ҳақида огоҳлантирди, деб маълум қилди Оқ уй.

Шунингдек, АҚШ президенти россиялик ҳамкасбини деэскалация ва дипломатияга чақирган.

Икки давлат президентларининг суҳбати қарийб бир соат давом этган. Кремлнинг билдиришича, мулоқот ўтказиш ҳақида Вашингтон илтимос қилган. Reuters манбасининг сўзларига кўра, Москва душанба куни президентлар ўртасида суҳбат ўтказишни сўраган, аммо Вашингтон суҳбат шанба куни ўтказилишини таклиф қилган. Россия бу таклифга рози бўлган.

Аввалроқ АҚШ давлат котиби Энтони Блинкен ва Байденнинг миллий хавфсизлик бўйича маслаҳатчиси Жейк Салливан Россиянинг Украинага бостириб кириши исталган вақтда бошланиши мумкинлигини айтганди.