Зеленский Путинга учрашишни таклиф қилди

Украина президенти Владимир Зеленский Россия президенти Владимир Путинга учрашишни таклиф қилди. У бу таклифни Мюнхендаги хавфсизлик бўйича конференцияда билдирди.

"Мен Россия президенти нима хоҳлаётганини билмайман, шунинг учун учрашишни таклиф қиламан", – деди Зеленский.

У шунингдек, Украина урушни тугатиш учун исталган шаклда ва исталган жойда музокара ўтказишга тайёрлигини айтди.

"Париж, Берлин, Минск, Истанбул, Женева, Брюссел, Нью-Йорк ёки Пекин – менга Украинада тинчлик ўрнатиш бўйича дунёнинг қайси нуқтасида келишишнинг фарқи йўқ. Тўртта, еттита ёки юзта мамлакат иштирок этиши ҳам аҳамиятсиз – асосийси, улар орасида Украина ва Россия бўлиши керак", – деди Украина раҳбари.

Унинг сўзларига кўра, тинчлик нафақат Украина, балки бутун дунёга керак.

"Ҳеч ким Украинани Ғарб ва Россия ўртасидаги қулай ва "абадий" буфер деб ўйламайди деган умиддаман. Бу ҳеч қачон бўлмайди, бунга ҳеч ким йўл қўймайди", – деди Зеленский.

Аввалроқ Украина президенти журналистлар билан суҳбат давомида Владимир Путин билан “исталган шаклда” учрашишга тайёрлигини айтганди.