Администрация ва ҳукуматга очиқлик нормаларини бузаётган ташкилотлар бўйича маълумот киритилди — Акмал Бурҳонов

Коррупцияга қарши курашиш агентлиги Президент администрацияси ва Вазирлар Маҳкамасига 2021 йил давомида очиқликка доир қонунчилик талабларини мунтазам равишда бузиб келган 10 дан ортиқ давлат органлари юзасидан таклиф-маълумотлар киритган. Уларнинг орасида вазирлик ва ҳокимликлар ҳам бор.

Бу ҳақда 10 март куни Жамоатчилик кенгаши олдида ҳисобот берган агентлик директори Акмал Бурҳонов маълум қилди.

“Албатта, бизга очиқликка доир фармон талабларини доимий равишда бузаётган амалдорларга оид маълумотларни Президент администрацияси ва ҳукуматга киритиш вазифаси қўйилган эди. Биз 2021 йил якунлари бўйича январ ойининг охирида ҳукуматга – бош вазир номига ҳам, Президент админстрациясига ҳам киритдик. Лекин, бу амалиёт янги жорий этилаётгани ва кўпчилиги [фармон талабларини] 2021 йил 1 октябр ва 1 декабрдан кучга киргани учун биз маълумот тариқасида киритдик.

Менимча, ҳали 3 ёки 4 ой бўлмасдан, қисқа муддатда қанақадир жавобгарлик масалаларини ҳам ҳал қилиш нотўғри бўларди. Агентлик сифатида ҳам… Лекин, биз маълумотни мунтазам равишда киритиб бориш амалиётини жорий қиламиз. Мен сизни ишонтириб айтаман, мана шу чорак якунлари бўйича ҳам администрация ва ҳукуматга киритиб, агар чора кўрилса натижаларини жамоатчиликка эълон қиламиз.

Шунингдек, биз мунтазам равишда [очиқликка доир фармон талабларини] бузаётган амалдорлар ҳақида маълумот киритганимизда администрацияга ҳам ҳукуматга жавобгарлик масаласини тезлаштириш бўйича таклиф бердик. Буни биз тезлаштирмас эканмиз, бу мунтазамлик касб этаверади, деган масалани қўйдик.

Балки, бу биринчи киритган маълумотларимиз бўйича ҳам чора кўриладиган бўлса, буни ҳам жамоатчиликка эълон қиламиз”, – дея Акмал Бурҳоновнинг сўзларини келтирмоқда Kun.uz мухбири.

Агентлик директори мазкур масала юзасидан Олий Мажлис Сенатининг навбатдаги ялпи йиғилишида батафсил ҳисобот беришини маълум қилди.

2021 йил июнида “Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида”ги президент фармони имзоланган эди. Ушбу фармон асосида давлат ташкилотлари томонидан очиқ маълумотлар сифатида жойлаштирилиши керак бўлган ижтимоий аҳамиятга молик 33 хил тоифадаги маълумотлар рўйхати тасдиқланган.

Шунингдек, фармон билан очиқликка оид қонунчилик ҳужжатларида кўрсатилган талабларни мунтазам равишда бузаётган айбдор мансабдор шахсларни жавобгарликка тортиш бўйича Президент Администрацияси ва Вазирлар Маҳкамасига таклифлар киритиб бориш вазифаси юклатилган.