Айрим турдаги хориж автомобиллари учун «растаможка» нархи пасайтирилди

15 апрел куни “Бюджетлараро муносабатларни ва солиқ маъмуриятчилигини янада такомиллаштириш тўғрисида”ги президент қарори имзоланди.

Қарорга мувофиқ, двигател сиғими 3000 см³ дан катта бўлган автомобилларнинг божхона расмийлаштируви икки босқичда пасайтирилмоқда:

• 15 апрелдан 31 декабргача бўлган муддатда бож ставкалари 30 фоиздан 15 фоизга туширилди; автомобил двигатели қувватининг ҳар бир куб см учун белгиланган қўшимча коэффициентлар ҳам икки баробар (3 доллардан 1,5 долларга) камайтирилди.
• 2023 йил 1 январдан бошлаб, автомобил двигатели қувватига боғланган қўшимча коэффициентлар яна бир бор пасайтирилади (1,5 доллардан 1,25 долларга), 15 фоизлик асосий бож ставкаси эса ўзгаришсиз қолади.

Янги тартиб ишлаб чиқарилган санасидан Ўзбекистон божхона чегарасини кесиб ўтган кунгача 1 йилдан ортиқ вақт ўтмаган автотранспорт воситаларига тааллуқли.

Бундан ташқари, гибрид автомобиллар (ҳам ички ёнув двигатели, ҳам электр двигателига эга автомобиллар) учун биринчи марта божхона ставкалари белгиланди. Эндиликда гибрид автомобилларни импорт қилиш учун двигател турига ва ишлаб чиқарилган муддатига қараб автомобил нархининг 15 фоизидан 30 фоизигача бож тўлаш керак бўлади. Илгари бу турдаги автомобиллар учун ҳам двигател қувватининг ҳар бир куб см учун белгиланган қўшимча коэффициентлар тўланарди.

Аввалроқ, 21 феврал куни имзоланган президент қарори билан, ишлаб чиқарилган санасига 1 йил тўлмаган, двигател сиғими 3000 см³ гача бўлган янги транспорт воситалари импорти учун ҳам божхона божи ва ҳар бир куб см учун белгиланган қўшимча коэффициентлар икки босқичда пасайтирилиши кўзда тутилганди.