Қозоғистон ва Қирғизистон махсус хизматлари 1,8 млн долларлик гиёҳвандлик моддаларини мусодара қилди 

Қирғизистон ИИВ гиёҳвандлик моддаларининг ноқонуний айланмасига қарши курашиш хизмати ва Қозоғистон махсус хизмати ходимлари интернет орқали Марказий Осиё мамлакатларига гиёҳвандлик моддалари етказиш ва сотиш билан шуғулланган жиноий тармоқни йўқ қилди. Бу ҳақда Tengrinews.kz хабар берди. 

Хабарда айтилишича, ҳамкорликдаги махсус операция 2021 йил ноябрдан 2022 йил апрелигача ўтказилган. 

Жиноят содир этишда гумонланиб тўрт нафар қозоғистонлик ва уч нафар қирғизистонлик қўлга олинган. Иккита нарколаборатория йўқ қилинган. 

Махсус операция давомида 31 килограмм 265 грамм гиёҳвандлик моддалари мусодара қилинган. 

"Гиёҳвандлик моддаларини сотишдан кўриладиган фойда тахминан 155 миллион 545 минг сом ёки 1 миллион 808 минг долларни ташкил этиши мумкин эди", - дейилади хабарда.