«Болаларга ҳужум қиладиганлар билан ёнма-ён турмайман» – G20 ТИВ раҳбарлари Лавров билан суратга тушишни исташмади

Россия ташқи ишлар вазири Сергей Лавров Индонезиянинг Бали оролларида ўтаётган «Катта йигирматалик» давлатлари ташқи ишлар вазирлари иштирокидаги саммитни муддатидан илгари тарк этди. У расмий тушлик ва саммитнинг кечки сессиясида иштирок этмади. Саммит бошланганидан кейин бошқа давлатлар ташқи ишлар вазирлари Лавров билан умумий суратга тушишни истамагани ҳақида хабарлар пайдо бўлганди.

Саммитга Лавров кириб бориши билан можаро бошланди. Reuters ўз манбаларига таяниб ёзишича, Лавров индонезиялик ҳамкасби Ретно Марсуди билан мулоқот ўтказаётганда атрофда «Урушни қачон тўхтатасизлар ахир?» деган овозлар эшитилган.

«Агрессорлар, босқинчилар... Бугун [биз ҳақимизда] яна кўп гапларни эшитдик. Ҳамма бизни бу операцияни тўхтатиб, тинчлик келишувига эришишга чақирди. Мен улардан нима хоҳлаётганликларини аниқлаб олишни сўрадим. Ғарб тинчлик музокараларини хоҳласа, уни Украина тўхтатиб қўйганини эътиборга олиши керак», дея Лавровнинг саммит чоғидаги сўзларини келтирган ТАСС нашри.

Япониянинг Kiodo нашрига кўра, АҚШ давлат котиби Энтони Блинкен ташаббуси билан «Катта еттилик» давлатлари ТИВ раҳбарлари Лавров билан бирга суратга тушишни истамаган. Саммит иштирокчиси бўлмиш Германия ташқи ишлар вазири Анналена Бербок бойкот ҳақида очиқ айтди. «Украинада тинч аҳолига, қарияларга, болаларга ҳужум қилаётганлар билан ёнма-ён туришни истамайман. Шу сабаб бу саммитда умумий сурат бўлмайди», деган Бербок журналистларга.

«Ахир мен ҳеч кимни суратга тушишга таклиф қилмадим»

Лавровнинг ўзи ҳам у билан суратга тушишни истамаганларига муносабат билдирди. «Мен билан суратга тушмасликлари ҳақида айтишмоқда, ахир мен бу ерга ҳеч кимни суратга тушишга таклиф қилганим йўқ-ку. Мени Индонезия таклиф қилди. Индонезия ноябрда бўладиган саммитга президент Путинни ҳам таклиф қилган», деди Лавров.

Украина нашрларининг ёзишича, Лавров саммитда Украина ташқи ишлар вазири Дмитро Кулеба онлайн иштирокини бошлаганидан кейин зални тарк этган. У Германия ТИВ раҳбари Бербокнинг чиқишини ҳам эшитмаган.

Лавров саммитнинг Блинкен нутқ сўзлаган кечки сессиясида ҳам иштирок этмаган. Блинкен чиқишида хавфсизлик бўйича Россияга боғлиқ масалалар, руслар портларни блоклаши сабаб қолиб кетаётган Украина донини олиб чиқиш каби мавзуларда нутқ сўзлаган.

«Россиялик ҳамкасбларимга мурожаат қилмоқчиман: Украина – сизнинг давлатингиз эмас. Унинг донлари ҳам – сизники эмас. Нега портларни ёпиб ўтирибсиз? Бу донлар олиб чиқилишига имкон беришингиз керак», деди Блинкен. АҚШ вакилларининг айтишича, Лавров Блинкен билан учрашишни рад этган.

Бу баёнотгача Лавров айнан Украина мамлакатдаги портларни очиши кераклиги, Украина ҳудудидан ташқаридаги сувларда Россия ва Туркия хавфсизликни таъминлашга тайёрлигини айтганди. Унинг айтишича, Украина портлар атрофини миналаштирган.

«Катта йигирматалик» давлатлари ТИВ раҳбарларининг бу галги саммитидаги асосий масалалардан бири айнан озиқ-овқат хавфсизлиги бўлди. Ғарб Россия Украинага бостириб кирганидан кейин Украина дон маҳсулотларини экспорт қилишига қаршилик кўрсатмоқда деб ҳисоблайди. Бунинг оқибатида бутун дунё озиқ-овқат бозорида муаммолар пайдо бўла бошлади.

Россия дунё озиқ-овқат бозорида дефицит пайдо бўлишига алоқадорлигини рад этиб келади. Москва Украинадаги маҳсулотлар портларга борадиган сув йўллари айнан Украина томонидан миналаштирилгани учун етиб бормаётганини иддао қилади. Шунингдек, Москва дунёдаги озиқ-овқат тақчиллигига Ғарб киритаётган санкциялар сабаб деб ҳисоблайди.