20 январь куни Россия ташқи ишлар вазири Сергей Лавров мамлакат дипломатиясининг 2025 йилдаги фаолияти якунларига доир матбуот анжуманида чиқиш қилди. Associated Press нашри Сергей Лавров нутқидаги муҳим иқтибосларни жамлади.
Гренландия ва НАТО ҳақида
Сергей Лавров АҚШ президентининг Гренландияни эгаллашга қаратилган уринишлари НАТО учун «чуқур инқироз» бошланганидан дарак беришини айтди. Унга кўра, бу «альянснинг ягона ҳарбий-сиёсий блок сифатида сақланиб қолиши масаласини шубҳа остига қўяди».
«Бундай ҳолат юз бериши мумкинлигини аввал тасаввур қилиш қийин эди. Бу – НАТОнинг бир аъзоси блокнинг бошқа бир аъзосига ҳужум қиладиган сценарийни юзага келтириши мумкин», деди Лавров матбуот анжуманида.
Унинг айтишича, Доналд Трампнинг ҳаракатлари Россия узоқ вақтдан бери танқид қилиб келаётган «қоидаларга асосланган глобал тартиб» ҳақидаги Ғарб концепциясини остин-устун қилган.
«Энди қоидаларни ‘Kоллектив Ғарбʼ эмас, балки унинг фақат бир вакили ёзмоқда», деди Лавров киноя билан. «Бу Европа учун катта ларза бўлди ва биз буни кузатяпмиз. Хавфсизлик ва ҳамкорликни таъминлашга қаратилган Евро-атлантика концепцияси ўзини оқламади».
Лавровнинг даъво қилишича, Даниянинг Гренландия устидан назорати мустамлакачилик давридан қолган мерос. «Аслида, Гренландия Даниянинг табиий бир қисми эмас», дея қўшимча қилди у.
Шу билан бирга, Лавров Россия ва Хитой оролга таҳдид солиши мумкинлиги ҳақидаги Трампнинг гапларини қатъиян рад этди.
«Бизнинг бунга ҳеч қандай алоқамиз йўқ. Албатта, биз бу жиддий геосиёсий вазиятни кузатяпмиз ва у ҳал бўлгач, хулосаларимизни чиқарамиз», деди Лавров.
Трампнинг «Тинчлик кенгаши» борасида
Москва ташқи сиёсатидаги устувор йўналишларига бағишланган анжуманда сўзлар экан, Лавров Трампнинг «Тинчлик кенгаши» ташаббусини эҳтиёткорона маъқуллади.
