Германия 2022 йил охиригача Россия кўмири ва нефтига қарамликдан қутулади

Германия шу йилнинг 1 августидан Россия кўмиридан, 2022 йил 31 декабрдан эса Россия нефтидан мустақил бўлади. Бу ҳақда 13 июль, чоршанба куни федерал канцлер идораси давлат котиби Йорг Кукис Сиднейда Халқаро энергетика агентлиги ва Австралия ҳукумати томонидан ташкил этилган энергетика форумида сўзлаган нутқида маълум қилди. 

Кукиснинг фикрича, Россия кўмири ва нефтидан воз кечиш Германиянинг энергия таъминоти тузилмасини тубдан ўзгартиради. Илгари Россия Германия истеъмол қилган кўмир ва нефтнинг 40 фоизини етказиб берган. «Собиқ иттифоққа бутун Шарқий Европада таъсир воситаси бўлиб хизмат қилган «Дружба» қувури тарихидан хабардор бўлган ҳар бир киши тушунадики, бу қарамликдан қутулиш осон эмас, лекин биз шундай қиламиз. Бир неча ой ичида буни амалга оширишга қодир бўламиз», - дея амалдорнинг сўзларидан иқтибос келтиради Reuters агентлиги. 

Россия газига қарамлик янада жиддийроқ. Йорг Кукиснинг эслатишича, Европа иттифоқи ҳар йили Россиядан 158 миллиард кубометрга яқин газ олади. АҚШ ва Қатар биргаликда Европага 30 миллиард кубометр суюлтирилган табиий газ (СТГ) етказиб бера олса-да, дефицит жуда катта бўлиб қолаверади. «Биз бу масалани эътиборсиз қолдира олмаймиз», деди Кукис. Айни пайтда Германияда СТГ қабул қилиш терминалларини яратиш устида жадал иш олиб борилмоқда. Германия ҳукумати Шимолий денгиз соҳилида режалаштирилган тўртта сузувчи СТГ терминалларидан иккитасини жорий қишда фойдаланишга топширишга умид қилмоқда.