ЖЧ-2026 ва Осиё Кубоги-2027 саралаши формати эълон қилинди

2026 йилда АҚШ, Канада ва Мексикада ўтказиладиган жаҳон чемпионатига Осиё минтақасидан 8 та йўлланма ажратилган.

Биринчи саралаш босқичида ФИФА рейтингининг энг қуйи қисмида бораётган 22 та миллий жамоа қуръа бўйича 11 та жуфтликка ажратилади ва уй/сафар тизимида ўзаро беллашади. Ғолиблар иккинчи босқичга йўл олади.

Иккинчи босқичда 36 та миллий жамоа иштирок этади (ФИФА рейтингидаги энг яхши 25 жамоа + биринчи саралаш босқичининг 11 ғолиби). Улар 4 та иштирокчидан иборат 9 та гуруҳга бўлинади. Ўйинлар икки даврали тизимда ўтказилади. Ҳар бир гуруҳдан дастлабки икки ўринни эгаллаган миллий жамоалар (жами 18 та) учинчи босқичга йўл олади.

Учинчи босқичда миллий жамоалар 6 та иштирокчидан иборат 3 та гуруҳга бўлинади. Ўйинлар икки даврали тизимда ўтказилади. Ҳар бир гуруҳдан дастлабки икки ўринни эгаллаган миллий жамоалар (жами 6 та) ЖЧ-2026 йўлланмасига эга бўлади.

Қолган 2 та йўлланма ва қитъалараро плей-оффдаги 1 та йўлланма тўртинчи босқичда ўйналади. Унда учинчи босқич гуруҳларида учинчи ва тўртинчи ўринни эгаллаган жамоалар (жами 6 та) 3 та иштирокчидан иборат 2 та гуруҳга ажратилади. Гуруҳ ғолиблари ЖЧ-2026 йўлланмасига эга бўлади. Иккинчи ўринни эгаллаган миллий жамоалар эса қитъалараро плей-офф йўлланмаси учун курашади. 

2027 йилги Осиё Кубогида 24 та жамоа иштирок этади. Ҳозирча мезбон мамлакат номи маълум эмас. Саралаш ўйинлари ЖЧ-2026 саралаши билан қўшилган ҳолда ўтказилади.

ЖЧ-2026 саралашининг иккинчи босқичидаги 9 та гуруҳда дастлабки икки ўринни эгаллаган миллий жамоалар (жами 18 та) Осиё Кубоги-2027 йўлланмасига эга бўлади. 

Қолган 6 та йўлланма қуйидаги тизимда ўйналади:

Плей-офф раунди. Унда ЖЧ-2026 саралашининг биринчи босқичида мағлуб бўлган 11 та миллий жамоадан энг яхшиси ОК-2027 саралашининг учинчи босқичига йўл олади. Қолган 10 таси уй/сафар тизимида ўйнаб, 5 та ғолибни аниқлаб беришади. 

Якуний босқич. ЖЧ-2026 саралашининг биринчи босқичида мағлуб бўлган энг яхши жамоа + иккинчи босқичда гуруҳда учинчи ва тўртинчи ўринларни эгаллаган 18 жамоа + плей-оффнинг энг яхши 5 жамоаси (жами 24 жамоа) 4 та иштирокчидан иборат 6 та гуруҳга ажратилади. Гуруҳ ғолиблари ОК-2027 йўлланмасига эга бўлади.