Мактабдан ташқари таълимни ривожлантириш дастури эълон қилинди

“Мактабдан ташқари таълим тизимини ривожлантириш дастурини амалга ошириш чора-тадбирлари тўғрисида”ги президент қарори лойиҳаси эълон қилинди.

2022-2026 йилларда халқ таълимида мактабдан ташқари таълим тизимини ривожлантириш бўйича дастур тасдиқланади.

Қуйидагилар дастур асосий йўналишлари этиб белгиланади:

• тўгаракларга малакали мутахассисларни жалб этиш ва тўгарак раҳбарлари малакасини ошириш тизимини такомиллаштириш;
• умумий ўрта таълим муассасалари ва “Болалар кутубхоналари” кутубхоначилари малакасини мунтазам равишда ошириш;
• “Баркамол авлод” болалар мактаблари ходимлари ва тўгарак раҳбарлари иш ҳақини босқичма-босқич ошириш;
• хорижий экспертларни жалб этган ҳолда машғулотлар жараёнига жаҳон амалиётида кенг қўлланиладиган замонавий таълим дастурлари ва технологияларини жорий этиш, ўқув режа ва дастурларни такомиллаштириш;
• замонавий тўгараклар, хусусан STEAM–таълим бўйича тўгарак раҳбарлари учун ўқув-методик қўлланмалар ва кўргазмали воситаларни яратиш;
• умумий ўрта таълим мактаблари кутубхоналарини ўқувчилар дунёқарашини оширишга, ижодий фикрлашга ўргатадиган қўшимча адабиётлар билан таъминлаш;
• миллий ва жаҳон адабиётларини қардош тилларга таржима қилиш ва марказлашган ҳолда нашр этиш;
• “Болалар кутубхоналари” ва умумий ўрта таълим муассасалари учун жаҳон ва миллий адабиёт дурдоналарига кирувчи асарлар аудиокитоб шаклларини яратиш;
• умумий ўрта таълим мактаблари ва “Баркамол авлод” болалар мактабларида замонавий тўгараклар фаолиятини йўлга қўйиш;
• маҳаллий бюджет маблағлари ҳисобидан халқаро кўрик-танловларда ғолиб бўлган тўгарак аъзоларини рағбатлантириш тизимини жорий этиш;
• “Баркамол авлод” болалар мактаблари ҳамда умумий ўрта таълим муассасалари кутубхоналари моддий-техника базасини мустаҳкамлаш;
• илғор хорижий тажрибани ҳисобга олган ҳолда замонавий тўгаракларни зарур жиҳозлар билан таъминлаш;
• умумий ўрта таълим муассасалари кутубхоналарига “Электрон кутубхона” тизимини жорий қилиш, кутубхоналарда Wi-Fi зоналарини ташкил этиш.

Халқ таълими вазирлиги Олий ва ўрта махсус таълим вазирлиги билан биргаликда 2023 йил 1 сентябрга қадар хорижий экспертларни жалб этган ҳолда замонавий, хусусан SТЕАМ–таълим бўйича тўгараклар ўқув-методик таъминотини яратади ҳамда ўқувчиларни касбга йўналтириш ишларини ташкил этади.

Ҳар йили умумий ўрта таълим муассасалари, “Баркамол авлод” болалар мактаблари ва “Болалар кутубхоналари” томонидан 5 та муҳим ташаббус, китобхонлик ва бошқа ижодий кўрик-танловлар, фестивалларини ўтказиш бўйича календарь режа ишлаб чиқилади ва тасдиқланади.