ЕИ энергетика вазирлари Россия гази нархига чегарани кўриб чиқади

Европа иттифоқи энергетика вазирлари кенгашининг 9 сентябр куни бўлиб ўтадиган фавқулодда йиғилишида Россиядан газ нархига чеклов жорий этиш масаласи муҳокама қилинади, бироқ йиғилишда кенгаш Европа комиссиясига ушбу чорани зудлик билан жорий этишга чақириши даргумон. Бу ҳақда 8 сентябр, пайшанба куни Брюсселда вазирлар кенгаши йиғилиши арафасида ўтказилган брифингда ЕИнинг юқори мартабали амалдори маълум қилди.

Унинг сўзларига кўра, аввалги муҳокамаларда мамлакатларнинг салмоқли гуруҳи ушбу чорани ёқлаб чиқишган, бироқ ҳозир унинг Европа иттифоқида жорий этилиши учун кўпчилик овоз йўқ. Расмийнинг тушунтиришича, кўплаб ҳукуматлар биринчи навбатда ўз мамлакатларидаги вазият учун бундай ҳаракатнинг оқибатларини баҳолашлари керак.

Унинг сўзларига кўра, Европа иттифоқини энергетик инқироздан олиб чиқиш бўйича Европа комиссияси томонидан ишлаб чиқилган бешта таклифдан учтаси Европа иттифоқи кўпчилик мамлакатларида ижобий қабул қилинмоқда: пик соатларда электр энергиясини тежаш, бозордаги ўзгарувчанликни енгиш учун энергетика корхоналарида ликвидликни таъминлаш ва юқори даромадли компаниялардан компенсацияни жорий этиш, арзон нархларда электр энергиясини ишлаб чиқариш.

Расмийнинг таъкидлашича, эндиликда Европа иттифоқи аъзолари учун бир неча ҳафта ичида жорий этилиши мумкин бўлган мувофиқлаштирилган мақсадли чора-тадбирларни тезда ишлаб чиқиш муҳим. Ҳар қандай фавқулодда янгиликлар вақтинчалик бўлади, дейилади ЕИ маълумотида.

Бир кун олдин, 7 сентябр куни Европа комиссияси президенти Урсула фон дер Ляйен инқирозли энергия режасини тақдим этди. У беш банддан иборат бўлиб, уни Европа иттифоқи жаҳон энергетика бозоридаги кескин вазият туфайли тезлаштирилган схема бўйича амалга ошириши мумкин. Шу нуқталардан бири Россия гази нархининг чекланишидир. Еврокомиссия Европа иттифоқига аъзо давлатлар харажатларини камайтириш мақсадида уни ўрнатишни таклиф қилган.