«Украина ҳудудларини озод этиш ҳуқуқига эга»: жаҳон етакчилари Путиннинг қарорига муносабат билдирди

Европа иттифоқи давлатлари, НАТО, G7 ва дунёнинг бошқа кўплаб давлатлари Россиянинг Украина тўртта ҳудудини аннексия қилганини, Россия президенти Владимир Путин 30 сентябр, жума куни имзолаган «шартнома»ни кескин қоралади. Жаҳон етакчилари Украинанинг аннексия қилинган Донецк, Луҳанск, Херсон ва Запорижжя областларини Россия бир қисми сифатида тан олиш ниятида эмасликларини билдирдилар, шунингдек, Москвага қарши янги санкциялар эълон қилишди.

Германия ташқи ишлар вазири Анналена Бербок Россиянинг Украина тўрт областини аннексия қилишини «БМТ низомини қўпол равишда бузиш» деб атади. «Аннексия ва сохта референдумлар театри» бу «ярим йилдан бери кўраётган нарсамиз – шафқатсиз зўравонлик, тасаввур қилиб бўлмайдиган усуллар билан кечаётган ерларни тортиб олишни яширишга уринишдир», деди Бербок ARD нашрига берган интервьюсида. Дунёнинг бирорта давлати бунга қўшила олмайди, деди Германия Ташқи ишлар вазирлиги раҳбари.

АҚШ, Канада, Буюк Британия, Франция, Швейцария, Исроил, Молдова ва бошқа давлатлар ҳам аннексия қилинган Украина ҳудудлари Россия таркибига кирганини тан олиш ниятида эмасликларини эълон қилишди.

«Қўшма Штатлар Россиянинг Украина ҳудудини аннексия қилишга бўлган фирибгарлик ҳаракатини қоралайди. Россия халқаро ҳуқуқни , БМТ низомини бузмоқда ва тинчликсевар халқларга нисбатан нафратини намойиш қилмоқда», - дейилади Оқ уй баёнотида.

«Биз халқаро ҳамжамиятни бу қадамларни қоралаш ва Россияни жавобгарликка тортиш учун бирлаштирамиз. Россиянинг қўшни давлат чегараларини ўзгартиришга қўпол уринишларига қарамай, Украинани ўзини ҳимоя қилиш учун зарур воситалар билан таъминлашда давом этамиз», деди АҚШ президенти Жо Байден. У эгаллаб олинган ҳудудлардаги псевдореферендумларни «мутлақ фарс» деб атади.

Путин Украина ҳудудларини Россияга «қўшиб олиш» тўғрисидаги фармонни имзолаганидан сўнг, АҚШ ва Буюк Британия Москвага қарши янги санкциялар киритилишини эълон қилди. Шу жумладан, Россия Марказий банки раҳбари Элвира Набиуллина Вашингтон ва Лондоннинг санкция рўйхатига киритилди. Мудофаа вазири Сергей Шойгунинг рафиқаси ва қизи ҳам АҚШнинг жазо чоралари остида қолди.

Россиянинг Украина ҳудудларини аннексия қилишини ва «қурол остида ўтказилган» сохта «референдумлар»ни ва «Еттилик гуруҳи» (G7) мамлакатлари ташқи ишлар вазирлари ҳеч қачон тан олмайди. «Биз Донецк, Луҳанск, Херсон, Запорижжя областлари ва Қрим Украинанинг ажралмас қисми эканлигини яна бир бор таъкидлаймиз», — дейилади уларнинг қўшма баёнотида. Катта еттилик мамлакатлари ташқи ишлар вазирлари Россияга нисбатан кейинги иқтисодий санкциялар қўлланилишидан огоҳлантирди.

Европа иттифоқи ҳам худди шундай позицияни эгаллади. «Биз ноқонуний «референдумлар»ни, шунингдек, уларнинг сохталаштирилган ва ноқонуний натижаларини тан олмаяпмиз ва ҳеч қачон тан олмаймиз», — дейилади Европа кенгаши баёнотида. - Бу қарорлар юридик кучга эга эмас ва ҳеч қандай ҳуқуқий оқибатларга олиб келиши мумкин эмас. Қрим, Херсон, Запорижжя, Донецк ва Луҳанск бу - Украина».

Европа иттифоқи «қатъий Украина ва унинг халқи томонида», деб таъкидлади Европа кенгаши. «Кремлнинг ядровий таҳдидлари, ҳарбий сафарбарлик ва Украина ҳудудини Россияники деб нотўғри кўрсатиш, энди эса у ерлардаги уруш Россия ҳудудида деб ҳисобланиши тўғрисида даъво қилиш стратегияси бизнинг қароримизни ўзгартирмайди», — дейилади баёнотда.

НАТО давлатлари аннексия қилинган ҳудудларни Россиянинг бир қисми сифатида ҳеч қачон тан олмайди, деди НАТО бош котиби Йенс Столтенберг ўз навбатида.

Альянсдаги иттифоқчилар Украина БМТ низомида мустаҳкамланган «ҳудудларини озод этишда давом этиш ҳуқуқига эга ва аннексия ҳеч нарсани ўзгартирмаслигига» ишончи комил. «Агар биз аннексияни қабул қилсак, бу Россиянинг ядровий шантажига берилиб кетганимизни англатади, кейин эса бошқа авторитар режимлар ўзлари хоҳлаган нарсага эришиш учун худди шундай таҳдидлардан фойдаланадилар», деб таъкидлади НАТО бош котиби.