АҚШ Украинага ҳаво ҳужумидан энг янги мудофаа тизимларини етказиб бермоқчи

АҚШ президенти Жозеф Байден Украина президенти Володимир Зеленский билан телефон орқали суҳбатда Вашингтон Киевга ўзини ҳимоя қилиш учун зарур бўлган ёрдам, жумладан, ҳаво ҳужумидан энг янги мудофаа тизимларини етказиб беришда давом этишига ишонтирди.

Фото: U.S. Army

Оқ уй Россияни жавобгарликка тортиш мақсадида АҚШнинг иттифоқчилари ва ҳамкорлари билан доимий алоқада эканликларини таъкидлади.

Шу билан бирга, Украина давлати раҳбари Киев «Россиянинг ракета шантажига эътибор бермаслигини» таъкидлади.

«Еттилик гуруҳи» (G7) давлатлари етакчилари 11 октябр куни Украинани қўллаб-қувватлаш бўйича виртуал учрашув ўтказадилар, унда Россиянинг бир кун аввал амалга оширилган ракета зарбалари ҳам муҳокама қилинади, деб хабар берди Оқ уй.

Учрашув иштирокчиларига Украина президенти Володимир Зеленский ҳам қўшилади.

Айни вақтда, Буюк Британия бош вазири Лиз Трасс Россиянинг Украинага берган ракета зарбалари муносабати билан НАТОга аъзо давлатлар раҳбарлари саммитини ўтказиш тарафдори, дейилади Британия ҳукумати раҳбари идораси тарқатган ҳужжатда.

Бундан ташқари, Трасс G7 йиғилиши иштирокчиларини Россияга қарши санкцияларни сақлаб қолишга ундамоқчи.

Аввалроқ АҚШнинг Киевдаги элчихонаси бугунги йирик ракета ҳужумидан сўнг Америка фуқароларини Украина ҳудудини «хавфсиз бўлганда» тарк этишга чақирганди.

«Россиянинг Украинага қарши қаратилган зарбаларни беришда давом этиши тинч аҳоли ва фуқаролик инфратузилмасига тўғридан тўғри таҳдид солади», — дейилади АҚШ ташқи сиёсат идораси баёнотида.

Россия 10 октябр, душанба куни эрталаб Киев, Днепр ва Украинанинг бошқа бир қатор шаҳарларига кучли ракета зарбалари берди. Киев мэри Виталий Кличкога кўра, пойтахт марказидаги Шевченко тумани ҳужумга учраган. Ракеталардан бири Михаил Грушевский ёдгорлиги ёнига қулаган, натижада унинг ёнидан ўтаётган автомобиллар ёниб кетган.

#АҚШ #Украина