Компания iPhone смартфонлари ва Маc компютерларини ишлаб чиқариш ва йиғишни Хитойдан қисман Ҳиндистон ва Таиландга кўчиришни бошлаган.
TF International Securities таҳлилчиси Минг-Чи Куо Apple компаниясининг ўз гаджетлари ишлаб чиқаришни Хитойдан дунёнинг бошқа мамлакатларига қисман ўтказиш ҳақидаги қарори тафсилотларини айтиб берди.
У расмий йўл харитасини эълон қилди. Ҳужжатга кўра, Apple ҳозирда iPhone смартфонлари ва Маc компютерларини ишлаб чиқариш ва йиғишни Хитойдан қисман Ҳиндистон ва Таиландга кўчиришни бошлаган.
Кўчириш қисман бўлса-да, жараён тахминан 3-5 йил давом этади. Бундан ташқари янги ходимларни ишга олишга тўғри келади.
Apple компанияси кўчириш натижасида таъминот занжирларини оптималлаштириш ва Хитойга қарамликни камайтиришни режалаштирмоқда.
Apple компаниясининг бу қарори Вашингтон ва Пекин ўртасидаги кескинликнинг кучайиши, шунингдек, Хитой ичидаги пандемия билан боғлиқ карантин чекловлари келтириб чиқарган муаммолар билан изоҳланади.
Куо сўзларига кўра, Ҳиндистон ҳудудида iPhone ишлаб чиқариш ва йиғишни Tata Group компанияси ташкил қилади. Ҳиндистон конгломерати Pegatron ёки Wistron билан ҳамкорликда ишлайди.
MacBook ишлаб чиқаришни Таиланддаги заводга кўчириш режалаштирилган. Компаниянинг бошқа гаджетларини кўчириш режалари ҳали йўл харитасида кўрсатилмаган.
«Уч-беш йил ичида Apple АҚШ бозорига Хитойдан ташқарида ишлаб чиқарилган смартфон ва компютерларни етказиб бериш ниятида. Келажакда Хитойда ишлаб чиқарилган қурилмалар фақат Хитой ичида сотилади», — деб хулоса қилади эксперт.
Аввалроқ Apple компанияси ҳамкорлардан AirPods ва Beats қулоқчинлари ишлаб чиқаришни Ҳиндистонга кўчиришни сўраган эди.
