Трамп сайловлардаги эҳтимолий сохталаштиришлар ҳақида ёлғон маълумот берган

АҚШнинг собиқ президенти Доналд Трамп 2020 йилда бўлиб ўтган президентлик сайловларида эҳтимолий сохталаштиришлар ҳақидаги маълумотларни атайлаб бузиб кўрсатган. Бу ҳақда Калифорния округ суди судьяси Дэвид Картернинг 19 октябр, чоршанба куни чиқарилган қарорида айтилади. Суд Оқ уй собиқ раҳбарининг адвокати Жон Истмендан Трамп билан электрон почта орқали ёзишмаларини 28 октябргача АҚШ Конгресси Вакиллар палатасининг Капитолийга бостириб киришни тергов қилаётган комиссиясига тақдим этишини талаб қилмоқда.

2020 йил ноябрь ойида демократ Жозеф Байден ғалаба қозонган президентлик сайловларидан сўнг Трамп ва унинг шериклари овоз беришда оммавий ҳуқуқбузарликлар содир этилгани бўйича ўнлаб даъво аризалари билан мурожаат қилишди. Жумладан, Калифорния судьяси келтирган Жоржия штатида тақдим этилган даъвода Оқ уй раҳбарининг адвокатлари округлардан бирида 10 315 та ўлик овозлар ҳисобланганлигини таъкидлаган.

Кейинроқ Истмен электрон почта орқали Трампга унга тақдим этилган баъзи маълумотлар нотўғри эканлиги ҳақида хабар берилганини ёзган. Бироқ, президент ва унинг адвокатлари худди шундай нотўғри рақамлар билан судга мурожаат қилишган ва Трамп ўзи билган барча маълумотлар тўғри эканлигига қасам ичган, дейилади судья Картер буйруғида. «Электрон почта хабарлари шуни кўрсатадики, президент Трамп сайловлардаги сохталаштиришлар ҳақидаги аниқ маълумотлар нотўғри эканлигини билган, лекин уларни суд ҳужжатларида ҳам, жамоатчиликка ҳам тарқатишда давом этган», - деди Калифорния суди.

Доналд Трампнинг 2021 йил 6 январда Вашингтондаги митингдаги нутқидан сўнг унинг радикал тарафдорлари Капитолийга бостириб киришди, у ерда Сенат ва Вакиллар палатаси қўшма йиғилиши иштирокчилари овоз бериш натижаларини маъқуллаётган бўлган. Намойишчилар бинога бостириб киришга муваффақ бўлди, Конгрессдаги мунозаралар бир неча соатга тўхтатилди, қонун чиқарувчилар эвакуация қилинди.

Тартибсизликлар иштирокчилари полиция билан тўқнашган, полиция эса кўздан ёш оқизувчи газ билан жавоб берган. Миллий гвардия Вашингтонга етиб келди. Тўқнашувда беш киши, жумладан бир полициячи ҳалок бўлган. Ҳукумат бир неча соатдан кейин яна Конгресс биносини назоратга олди. Кейинги ҳафталарда яна икки полициячи ўз жонига қасд қилди. Тартибсизликлардан кейин 50 га яқин одам ҳибсга олинган, уларнинг бир нечасига айблов эълон қилинган.

Капитолийга бостириб киришдан кейин Вакиллар палатаси қўмитаси Трампнинг воқеалардаги ролини аниқлаш учун 140 мингдан ортиқ ҳужжатларни ўрганиб чиқди ва 1000 дан ортиқ гувоҳлар билан суҳбатлашди. Оқ уйнинг собиқ раҳбари ўз айбини тан олмади ва 2024 йилда яна президентликка номзодини қўйиши мумкинлигини истисно қилмаяпти.