Киев: «Ғалла йўлаги» бўйлаб ҳаракат 3 ноябрдан тикланади

Жорий йилнинг 3 ноябрь куни Қора денгиз ғалла ташаббуси доирасида кемалар ҳаракати қайта тикланади. Бу ҳақда Украина инфратузилма вазири Александр Кубраков маълум қилди.

Фото: AP Photo/Khalil Hamra

Кутилишича, «ғалла йўлаги» орқали қишлоқ хўжалиги маҳсулотлари ортиб олинган 8 та кема ўтади.

Украина томони БМТдан тасдиқлов олди, дея қўшимча қилиб ўтди Александр Кубраков.

Аввалроқ Украинадан қишлоқ хўжалиги маҳсулотлари экспорти 21 миллион тоннага етгани хабар қилинганди.

Украина ва ЕИ ўртасидаги «бирдамлик линиялари» орқали 14 миллион тонна Украина қишлоқ хўжалиги маҳсулотлари, 7 миллион тоннаси эса Қора денгиз орқали экспорт қилинган, дея хабар берди ЕИ.

«Бирдамлик линиялари» - Украина ва Европа Иттифоқи ўртасидаги экспорт ва импорт учун асосий транспорт каналидир, дея таъкидлайди Европа Иттифоқи. 2022 йил май ойидан буён ушбу темирйўл линиялари бўйлаб ташилган хомашё ва товарларнинг умумий ҳажми 29 миллион тоннани ташкил этди. Қишлоқ хўжалиги маҳсулотларидан ташқари, Украинадан пўлат экспорт қилинади, гуманитар ёрдам ва зарур товарлар эса олиб кирилади, деди Стефан де Кирсмейкер.

Россиянинг Украинага кенг кўламли бостириб киришидан кейин халқаро ҳамжамият Киев билан биргаликда Украина товарларини экспорт қилишнинг иккита муқобил йўлини – Европа Иттифоқининг Украина билан «бирдамлик линияси» ва Қора денгиз йўлагини ташкил этишга муваффақ бўлди. Украина ва ЕИ ўртасидаги бирдамлик линиялари май ойида очилган, июль ойида эса Украина портларида юк кемаларини блокдан чиқариш бўйича вақтинчалик келишувга эришилган эди. Европа Комиссиясининг сўнгги маълумотларига кўра, август ойида «бирдамлик линияси» Украинадан (2,6 миллион тонна) қишлоқ хўжалиги экспортининг 61 фоизини, Қора денгиз йўлагидан эса 39 фоизни (1,6 миллион тонна) ташкил этган.

29 октябр куни Россия аннексия қилинган Қримдаги Севастопол ҳарбий-денгиз базасида Россия Қора денгиз флотининг кемалари ва инфратузилмасига ҳужум уюштирилгани муносабати билан «ғалла битими»ни номаълум муддатга тўхтатаётганини эълон қилди. Шу билан бирга, «бирдамлик линиялари» ўз фаолиятини давом эттиради, деб таъкидлади Европа комиссияси. Ушбу транспорт алоқаси ўрта ва узоқ муддатга мўлжалланган бўлиб, унинг иши такомиллаштирилади.